10 நிமிடத்தில் வீட்டிலேயே செய்யலாம் முட்டை ப்ரைடு ரைஸ்..!

முட்டை ப்ரைடு ரைஸ் ஹோட்டலில் வாங்கி சாப்பிட்டு இருப்பீங்க. இன்று வீட்டிலேயே எளிய முறையில் முட்டை ப்ரைடு ரைஸ் செய்வது எப்படி என்று பார்க்கலாம்.

தேவையான பொருட்கள் : பாசுமதி அரிசி, வெங்காயம், கேரட் , பீன்ஸ், வெங்காயத்தாள், குடை மிளகாய், இஞ்சி பூண்டு விழுது, முட்டை, சில்லி சாஸ், சோயா சாஸ், மிளகு தூள், நெய், தேவையான அளவு உப்பு

செய்முறை : வெங்காயத்தை நீள வாக்கில் வெட்டிக் கொள்ளவும். கேரட், பீன்ஸ், குடை மிளகாய், வெங்காயத்தாளை பொடியாக நறுக்கி கொள்ளவும்.

அடுத்து சாதத்தை உதிரியாக வேக வைத்து ஆற வைத்து கொள்ளவும்.

முதலில் ஒரு வாணலியில் சிறிது நெய் ஊற்றி முட்டையை உடைத்து ஊற்றி சிறிது உப்பு சேர்த்து பொரித்து கொள்ளவும்.

மற்றொரு வாணலியில் நெய் ஊற்றி சூடானதும் அதில் வெங்காயத்தைப் போட்டு வதக்கவும். அடுத்து அதில் பாதி வெங்காயத் தாளை சேர்த்து வதக்கி பின் இஞ்சி பூண்டு விழுது சேர்த்து வதக்கவும்.

அதன் பின் கேரட், பீன்ஸ் சேர்த்து கலர் மாறாமல் வதக்கவும். மேலும் அதில் குடைமிளகாயை போட்டு வதக்கவும்.

அனைத்தும் வெந்ததும் அதில் உப்பு, சோயா சாஸ், சில்லி சாஸ், மிளகு தூள் சேர்த்து நன்றாக கிளறி விட்டு மூடி வைத்து வேக வைக்கவும்.

காய்கள் நன்றாக வெந்த பின் ஆற வைத்த சாதம், பொரித்த முட்டை சேர்த்து நன்றாக கிளறி வெங்காயத்தாள் தூவி இறக்கவும். சூப்பரான முட்டை ப்ரைடு ரைஸ் ரெடி.