புதுடெல்லி,

இந்திய கிரிக்கெட் அணி இங்கிலாந்தில் சுற்றுப்பயணம் மேற்கொண்டு 5 போட்டிகள் கொண்ட டெஸ்ட் தொடரில் ஆட உள்ளது. இந்த தொடர் வரும் 20ம் தேதி தொடங்குகிறது. டெஸ்ட் கிரிக்கெட்டில் இருந்து ரோகித் ஓய்வு பெற்றுள்ளதால் இந்த தொடருக்கான இந்திய அணி சுப்மன் கில் தலைமையில் அறிவிக்கப்பட்டுள்ளது.

இந்த தொடருக்கான இந்திய அணியில் சாய் சுதர்சன், கருண் நாயர், அபிமன்யு ஈஸ்வரன், பிரசித் கிருஷ்ணா உள்ளிட்ட ஜூனியர் வீரர்கள் இடம் பிடித்துள்ளனர். சீனியர் வீரர்களான விராட், ரோகித், அஸ்வின் இல்லாமல் களம் காணும் இந்திய அணி இந்த தொடரை வெல்ல கடுமையாக போராடும்.

இந்நிலையில், இந்த தொடர் குறித்தும், இந்திய அணியில் இடம் பிடித்துள்ள வீரர்கள் குறித்தும், அணியின் பிளேயிங் லெவன்கள் குறித்து பல முன்னாள் வீரர்கள் தங்களது கருத்துகளை வெளியிட்டு வருகின்றனர். அந்த வகையில் இங்கிலாந்துக்கு எதிரான முதல் டெஸ்ட் போட்டிக்கான இந்தியாவின் பிளேயிங் லெவனை இந்திய முன்னாள் வீரரான சஞ்சய் பாங்கர் தேர்வு செய்துள்ளார்.

இந்த அணியில் சமீப காலமாக சிறப்பாக செயல்பட்டு வரும் சாய் சுதர்சனை, சஞ்சய் பாங்கர் தேர்வு செய்யவில்லை. அவருக்கு பதிலாக அபிமன்யு ஈஸ்வரனை 3வது இடத்தில் தேர்வு செய்துள்ளார். தொடக்க வீரர்களாக ஜெய்ஸ்வால் மற்றும் ராகுலை தேர்ந்தெடுத்துள்ளார். தொடர்ந்து 4வது இடத்தில் சுப்மன் கில்லையும், 5வது இடத்தில் கருண் நாயரையும், விக்கெட் கீப்பராக ரிஷப் பண்டையும் தேர்வு செய்துள்ளார்.

தொடர்ந்து ஆல் ரவுண்டர்கள் மற்றும் பந்துவீச்சாளர்களாக நிதிஷ் குமார் ரெட்டி, குல்தீப் யாதவ், பிரசித் கிருஷ்ணா, முகமது சிராஜ், ஜஸ்ப்ரீத் பும்ராவை தேர்ந்தெடுத்துள்ளார். இந்த அணியில் ரவீந்திர ஜடேஜாவுக்கு இடம் அளிக்கப்படவில்லை.

சஞ்சய் பாங்கர் தேர்வு செய்த பிளேயிங் லெவன்: யஷஸ்வி ஜெய்ஸ்வால், கே.எல்.ராகுல், அபிமன்யு ஈஸ்வரன், சுப்மன் கில் (கேப்டன்), கருண் நாயர், ரிஷப் பண்ட் (விக்கெட் கீப்பர், துணை கேப்டன்), நிதிஷ் குமார் ரெட்டி, குல்தீப் யாதவ், முகமது சிராஜ், ஜஸ்ப்ரீத் பும்ரா, பிரசித் கிருஷ்ணா.