மும்பை,

உலகின் பணக்கார கிரிக்கெட் வாரியமான பி.சி.சி.ஐ.-க்கு 2023-24-ம் ஆண்டில் மட்டும் ரூ.9,741.7 கோடி வருமானம் கிடைத்துள்ளதாக தகவல் வெளியாகியுள்ளது. இதில் ஐ.பி.எல். தொடரால் மட்டும் ரூ.5,761 கோடி வருமானம் (59 சதவீதம்) வந்துள்ளதாக கூறப்படுகிறது.

ஐ.பி.எல். தொடர் ஆரம்பிக்கப்பட்டதிலிருந்தே (2007-ம் ஆண்டு) பி.சி.சி.ஐ.-ன் வருமானம் அசுர வளர்ச்சி பெற்று வருகிறது. இந்திய வீரர்கள் மட்டுமின்றி, உலகின் திறமையான வீரர்களும் பங்கேற்பதால் இந்த தொடர் உலக அளவில் 'நம்பர் 1 டி20 லீக்' ஆக கருதப்படுகிறது. இதனால் இந்த தொடருக்கு நாளுக்கு நாள் ரசிகர்கள் மட்டுமின்றி வருமானமும் தொடர்ந்து அதிகரித்து வருகிறது.

அத்துடன் ஐ.பி.எல். தொடர் அல்லாமல் இந்தியாவில் நடைபெற்ற சர்வதேச தொடர்களுக்கான ஒளிபரப்பு உரிமைகள் மூலம் பி.சி.சி.ஐ.-க்கு ரூ.361 கோடி வருமானம் கிடைத்துள்ளதாகவும் தகவல் வெளியாகியுள்ளது. இந்திய கிரிக்கெட் வாரியத்திற்கு (பி.சி.சி.ஐ.) கிடைக்கும் வருமானத்தை கண்டு ரசிகர்கள் பிரமித்துள்ளனர்.