ஒரு நாள் கிரிக்கெட் தரவரிசையில் கோலி, பும்ரா முதலிடத்தில் நீடிப்பு

துபாய்,

சர்வதேச கிரிக்கெட் கவுன்சில் (ஐ.சி.சி.) ஒரு நாள் போட்டி வீரர்களின் புதிய தரவரிசை பட்டியலை நேற்று வெளியிட்டது. இதில் பேட்டிங் தரவரிசையில், ஆஸ்திரேலிய தொடரில் 2 சதங்கள் அடித்த இந்திய கேப்டன் விராட் கோலி 890 புள்ளிகளுடன் தொடர்ந்து முதலிடத்தில் நீடிக்கிறார். இந்திய துணை கேப்டன் ரோகித் சர்மா 2-வது இடத்திலும் (839 புள்ளி), நியூசிலாந்தின் ராஸ் டெய்லர் 3-வது இடத்திலும் (830 புள்ளி) உள்ளனர். தென்ஆப்பிரிக்க விக்கெட் கீப்பர் குயின்டான் டி காக் 4 இடங்கள் அதிகரித்து 803 புள்ளிகளுடன் 4-வது இடத்தை எட்டியுள்ளார். இலங்கைக்கு எதிரான தொடரில் ஒரு சதம், 3 அரைசதம் உள்பட 353 ரன்கள் குவித்ததன் மூலம் அவருக்கு இந்த ஏற்றம் கிடைத்துள்ளது.

இங்கிலாந்து ஒரு நாள் தொடரில் சிக்சர் மழை பொழிந்து 2 சதம் உள்பட 424 ரன்கள் சேர்த்து வியக்க வைத்த வெஸ்ட இண்டீஸ் வீரர் கிறிஸ் கெய்ல் 35 இடங்கள் எகிறி 41-வது இடத்துக்கு வந்துள்ளார். இந்திய தொடரில் 2 சதங்களுடன் 383 ரன்கள் எடுத்து தொடர்நாயகனாக தேர்வு செய்யப்பட்ட ஆஸ்திரேலிய வீரர் உஸ்மான் கவாஜா 83-வது இடத்தில் இருந்து 25-வது இடத்துக்கு முன்னேறியிருக்கிறார். இதே போல் இந்திய வீரர் கேதர் ஜாதவ் 11 இடங்கள் அதிகரித்து தனது வாழ்க்கையில் சிறந்த நிலையாக 24-வது இடத்தை அடைந்துள்ளார்.

பந்து வீச்சாளர்களின் தரவரிசையில் இந்திய வீரர் ஜஸ்பிரித் பும்ரா 774 புள்ளிகளுடன் முதலிடத்தை தக்க வைத்துள்ளார். 2-வது இடத்தில் டிரென்ட் பவுல்டும் (நியூசிலாந்து), 3-வது இடத்தில் ரஷித்கானும் (ஆப்கானிஸ்தான்), 4-வது இடத்தில் இம்ரான் தாஹிரும், 5-வது இடத்தில் ரபடாவும் (2 பேரும் தென்ஆப்பிரிக்கா) இருக்கிறார்கள்.

இந்திய சுழற்பந்து வீச்சாளர்கள் குல்தீப் யாதவ் 6-வது இடமும், யுஸ்வேந்திர சாஹல் 8-வது இடமும் வகிக்கிறார்கள். இந்திய தொடரில் 14 விக்கெட்டுகள் கைப்பற்றி அசத்திய ஆஸ்திரேலிய வேகப்பந்து வீச்சாளர் கம்மின்ஸ் 6 இடங்கள் உயர்ந்து 7-வது இடத்தை பிடித்துள்ளார்.

ஒரு நாள் போட்டி அணிகளின் தரவரிசையில் இங்கிலாந்து 123 புள்ளிகளுடன் முதலிடத்தில் நீடிக்கிறது. ஆஸ்திரேலிய தொடரை 2-3 என்ற கணக்கில் பறிகொடுத்த இந்திய அணி 2 புள்ளியை இழந்து 120 புள்ளிகளுடன் 2-வது இடத்தில் இருக்கிறது. ஆஸ்திரேலிய தொடரை இந்திய அணி முழுமையாக வென்றிருந்தால் முதலிடத்திற்கு வந்திருக்கும். நல்ல வாய்ப்பை இந்திய வீரர்கள் கோட்டை விட்டு விட்டனர்.

நியூசிலாந்து அணி (112 புள்ளி) 3-வது இடத்திலும், தென்ஆப்பிரிக்க அணி 4-வது இடத்திலும் (112 புள்ளி) உள்ளன. இந்தியாவுக்கு எதிரான தொடரை வசப்படுத்தியதால் 3 புள்ளிகள் கூடுதலாக பெற்ற ஆஸ்திரேலிய அணி மொத்தம் 103 புள்ளிகளுடன் ஒரு இடம் முன்னேறி 5-வது இடத்தை பெற்றுள்ளது.