துபாய்,
ஐக்கிய அரபு அமீரகத்தில் நடைபெற்று வரும் இன்றைய ஐ.பி.எல். ஆட்டத்தில் சன்ரைசர்ஸ் ஐதராபாத் அணியும் டெல்லி கேப்பிடல்ஸ் அணியும் விளையாடி வருகின்றன. சன்ரைசர்ஸ் ஐதராபாத் அணி டாஸ் வென்று முதலில் பேட்டிங்கை தேர்வு செய்தது.
இதன்படி முதலில் பேட்டிங்கை துவக்கிய ஐதராபாத் அணியில் தொடக்க வீரர்களாக களமிறங்கிய டேவிட் வார்னர் மற்றும் ரித்திமான் சஹா சிறப்பான தொடக்கம் தர தவறினர். பெரிதும் எதிர்பார்க்கப்பட்ட சன்ரைசர்ஸ் ஐதராபாத் அணியின் அதிரடி ஆட்டக்காரர் டேவிட் வார்னர் டக் அவுட் ஆகி ஏமாற்றம் அளித்தார். பவர்பிளே முடிவில் ஐதராபாத் அணி 2 விக்கெட்டுகள் இழப்புக்கு 32 ரன்கள் மட்டுமே எடுத்தது.
தொடர்ந்து நிதான ஆட்டத்தை வெளிப்படுத்தி வந்த ஐதராபாத் அணி சீரான இடைவெளிகளில் விக்கெட்டுகளை பறிகொடுத்தது. டெல்லி அணியின் சிறப்பான பந்துவீச்சை எதிர்கொள்ள முடியாமல் ஐதராபாத் அணி வீரர்கள் அடுத்தடுத்து ஆட்டமிழந்தனர். ஆட்டத்தின் 9 வது ஓவரில் காலில் ஏற்பட்ட காயம் காரணமாக டெல்லி அணியின் நட்சத்திர வீரர் மார்கஸ் ஸ்டாய்னிஸ் பாதியிலேயே வெளியேறினார்.
முதல் 10 ஓவர்களில் ஐதராபாத் அணி 3 விக்கெட்டுகள் இழப்புக்கு 61 ரன்கள் எடுத்தது. ஐதராபாத் அணி 20 ஓவர்களில் 9 விக்கெட்டுகளை இழந்து 134 ரன்கள் எடுத்தது. இதையடுத்து, 135 ரன்கள் எடுத்தால் வெற்றி என்ற இலக்குடன் டெல்லி அணி பேட்டிங் செய்து வருகிறது.
ஐதராபாத் அணியில் அதிகபட்சமாக அப்துல் சமாத் 28 ரன்களும், ரஷித் கான் 22 ரன்களும் எடுத்தனர். டெல்லி அணியில் சிறப்பாக பந்துவீசிய ககிசோ ரபடா அதிகபட்சமாக 3 விக்கெட்டுகளை கைப்பற்றினார். டெல்லி கேப்பிடல்ஸ் அணி தரப்பில் ரபடா 3 விக்கெட்டுகளையும், நோர்ஜோ 2 விக்கெட்டுகளையும், அக்சர் பட்டேல் 2 விக்கெட்டுகளையும் வீழ்த்தினர்.