புச்சிபாபு கிரிக்கெட்: தமிழக லெவன்- அரியானா ஆட்டம் மழையால் பாதிப்பு

சென்னை,

தமிழ்நாடு கிரிக்கெட் சங்கம் சார்பில் புச்சிபாபு கோப்பைக்கான அகில இந்திய அழைப்பு கிரிக்கெட் போட்டி சென்னையில் நடந்து வருகிறது. இதில் பங்கேற்றுள்ள 16 அணிகள் 4 பிரிவாக பிரிக்கப்பட்டு மோதுகின்றன. 3 நாள் நடக்கும் இந்த லீக் ஆட்டத்தில் முதல் இன்னிங்ஸ் 90 ஓவர்களாகவும், 2-வது இன்னிங்ஸ் 45 ஓவர்களாகவும் நிர்ணயிக்கப்பட்டுள்ளது.

கோஜன் கல்லூரி மைதானத்தில் நடந்து வரும் மராட்டியத்துக்கு எதிரான ஆட்டத்தில் (ஏ பிரிவு) முதலில் பேட் செய்த தமிழ்நாடு கிரிக்கெட் சங்க தலைவர் லெவன் அணி முதல் நாளில் 90 ஓவர்களில் 9 விக்கெட்டுக்கு 384 ரன்கள் எடுத்தது. 2-வது நாளான நேற்று மழையால் ஆட்டம் தாமதமாக தொடங்கியது. தனது முதல் இன்னிங்சை ஆடிய மராட்டிய அணி நேற்றை ஆட்டநேரம் முடிவில் 24 ஓவர்களில் 2 விக்கெட்டுக்கு 105 ரன்கள் எடுத்துள்ளது.

மற்றொரு ஆட்டத்தில் (பி பிரிவு) பரோடா அணி தனது முதல் இன்னிங்சில் 176 ரன்னில் அடங்கியது. இதைத் தொடர்ந்து ஆடிய ஜம்மு-காஷ்மீர் முதல் நாள் முடிவில் ஒரு விக்கெட்டுக்கு 48 ரன்கள் எடுத்திருந்தது. நேற்று தொடர்ந்து பேட் செய்த அந்த அணி 280 ரன்னில் ஆல்-அவுட் ஆனது. அதிகபட்சமாக கம்ரான் இக்பால் 81 ரன்னும், முசைப் அஜாஸ் 80 ரன்னும் எடுத்தனர். பரோடா தரப்பில் ஆர்யன் சாவ்டா 5 விக்கெட் வீழ்த்தினார். இதையடுத்து 104 ரன்கள் பின்தங்கிய நிலையில் 2-வது இன்னிங்சை தொடங்கிய பரோடா ஆட்டநேரம் முடிவில் விக்கெட் இழப்பின்றி 4 ரன் எடுத்துள்ளது.

பெங்காலுக்கு எதிரான ஆட்டத்தில் (சி பிரிவு) மும்பை அணி முதல் நாள் முடிவில் 7 விக்கெட்டுக்கு 224 ரன்கள் எடுத்திருந்தது. தொடர்ந்து ஆடிய அந்த அணி 266 ரன்னில் அடங்கியது. இதையடுத்து தனது முதல் இன்னிங்சை தொடங்கிய பெங்கால் அணி ஒரு விக்கெட்டுக்கு 57 ரன்கள் எடுத்துள்ளது. தமிழ்நாடு கிரிக்கெட் சங்க லெவன்- அரியானா (சி பிரிவு) இடையிலான நேற்றைய ஆட்டம் மழை காரணமாக ஒரு பந்து கூட வீசப்படாமல் கைவிடப்பட்டது. இன்று 3-வது மற்றும் கடைசி நாள் ஆட்டம் நடக்கிறது.