புதுடெல்லி,

நடப்பு சாம்பியன் இந்தியா உள்பட 8 அணிகள் பங்கேற்கும் 17-வது ஆசிய கோப்பை கிரிக்கெட் தொடர் செப்டம்பர் 9-ந்தேதி முதல் 28-ந்தேதி வரை ஐக்கிய அரபு அமீரகத்தில் நடைபெறுகிறது. அடுத்த வருடம் நடைபெற உள்ள ஐ.சி.சி. டி20 உலகக்கோப்பைக்கு ஆசிய அணிகள் தயாராகும் பொருட்டு இந்த தொடர் இம்முறை டி20 வடிவில் நடத்தப்பட உள்ளது. இந்த தொடரில் பங்கேற்றுள்ள அணிகள் 2 பிரிவுகளாக பிரிக்கப்பட்டுள்ளன.

அதன்படி 'ஏ' பிரிவில் நடப்பு சாம்பியன் இந்தியா, பாகிஸ்தான், ஐக்கிய அரபு அமீரகம், ஓமன் அணிகளும், 'பி' பிரிவில் ஆப்கானிஸ்தான், வங்காளதேசம், இலங்கை, ஹாங்காங் அணிகளும் இடம் பெற்றுள்ளன. ஒவ்வொரு அணியும் மற்ற அணிகளுடன் தலா ஒரு முறை மோதும். லீக் சுற்று முடிவில் இரு பிரிவிலும் முதல் இரு இடங்களை பிடிக்கும் அணிகள் சூப்பர்4 சுற்றுக்கு முன்னேறும்.

இதில் இந்திய அணி தனது முதல் ஆட்டத்தில் ஐக்கிய அரபு அமீரகத்தை செப்.10-ந் தேதி துபாயில் சந்திக்கிறது. இதைத்தொடர்ந்து பரம எதிரியான பாகிஸ்தானை செப்.14-ந் தேதி துபாயிலும், ஓமனை செப்.19-ந் தேதி அபுதாபியிலும் எதிர்கொள்கிறது. இறுதிப்போட்டி செப்.28-ந் தேதி துபாயில் அரங்கேறுகிறது. இந்த தொடருக்கான இந்திய அணி வரும் 19-ம் தேதி அறிவிக்கப்பட உள்ளது.

இந்நிலையில், இந்த தொடரில் இந்திய அணியை பாகிஸ்தான் வீழ்த்தும் என தேர்வுக்குழு தலைவர் மற்றும் முன்னாள் பாகிஸ்தான் வீரரான ஆகிப் ஜாவேத் கூறியுள்ளார். இது தொடர்பாக அவர் கூறியதாவது, இந்த பாகிஸ்தான் அணி ஆசிய கோப்பையில் இந்தியாவை தோற்கடிக்கும் திறன் இருக்கிறது. நீங்கள் விரும்பினாலும் இல்லையென்றாலும் இந்தியா - பாகிஸ்தான் போட்டிகள் உலக கிரிக்கெட்டில் மிகவும் பெரியது.

இதை ஒவ்வொரு வீரர்களும் அறிவார்கள். எங்களுடைய அணி எந்த எதிரணியையும் வீழ்த்தும் திறமையைக் கொண்டுள்ளது. எங்கள் வீரர்கள் அனைவரும் தயாராக இருக்கிறார்கள். தற்போது இந்தியா - பாகிஸ்தான் இடையே எம்மாதிரியான சூழல் நிலவுகிறது என்பதை அனைவரும் அறிவார்கள். எனவே, வேறு எதையும் சொல்லி எங்கள் அணி மீது நாங்கள் எக்ஸ்ட்ரா அழுத்தத்தைப் போட விரும்பவில்லை. இவ்வாறு அவர் கூறினார்.