உலகக் கோப்பை கால்பந்து பயிற்சி ஆட்டம்: ஐக்கிய அரபு அமீரகத்தை துவம்சம் செய்தது அர்ஜென்டினா அணி

அபுதாபி,

பிபா சர்வதேச கால்பந்து கூட்டமைப்பு 4 ஆண்டுகளுக்கு ஒருமுறை கால்பந்து உலகக் கோப்பை தொடரை நடத்திவருகிறது. கால்பந்து உலக கோப்பை தொடர் சர்வதேச அளவில் கால்பந்து ரசிகர்களால் பெரிதும் எதிர்பார்க்கப்படும் விளையாட்டு திருவிழா.

22-வது உலகக் கோப்பை கால்பந்து போட்டி கத்தாரில் வருகிற 20-ந்தேதி தொடங்குகிறது. இந்த கால்பந்து தொடரில் நடப்பு சாம்பியன் பிரான்ஸ், முன்னாள் சாம்பியன்களான பிரேசில், ஜெர்மனி, அர்ஜென்டினா, இங்கிலாந்து, ஸ்பெயின் உள்பட 32 அணிகள் பங்கேற்கின்றன.

அவை 8 பிரிவாக பிரிக்கப்பட்டு லீக்கில் மோதுகின்றன. 20-ந்தேதி நடக்கும் தொடக்க ஆட்டத்தில் கத்தார்- ஈகுவடார் அணிகள் சந்திக்கின்றன.

இந்த நிலையில் உலகக் கோப்பை கால்பந்து தொடருக்கு தயாராகும் விதமாக ஒவ்வொரு அணிகளும் பயிற்சி ஆட்டங்களில் விளையாடி வருகின்றனர். அந்த வகையில் அபுதாபியில் இன்று நடந்த பயிற்சி ஆட்டத்தில் ஐக்கிய அரபு அமீரக அணியும்- மெஸ்ஸி தலைமையிலான அர்ஜென்டினா அணியும் மோதின.

இந்த போட்டியில் ஆரம்பம் முதலே ஆதிக்கம் செலுத்திய அர்ஜென்டினா அணி வீரர்கள் கோல் மழை பொழிந்து அமீரக அணியை துவம்சம் செய்தனர். இறுதியில் அர்ஜென்டினா அணி 5-0 என்ற கோல் கணக்கில் ஐக்கிய அரபு அமீரக அணியை வீழ்த்தி வெற்றி பெற்றது.

அர்ஜென்டினா அணி தரப்பில் ஏஞ்சல் டி மரியா இரண்டு கோல்களும், லியோனல் மெஸ்ஸி, ஜூலியன் அல்வாரெஸ் மற்றும் ஜோக்வின் கொரியா ஆகியோர் தலா ஒரு கோலும் அடித்தனர்.