புதுடெல்லி,
இந்திய ஆடவர் மற்றும் மகளிர் ஹாக்கி அணிகளின் கேப்டன்களாக ஸ்ரீஜேஷ் மற்றும் ராணி ராம்பால் ஆகியோர் நியமனம் செய்யப்பட்டுள்ளனர்.
காயம் காரணமாக சில மாதங்களாக கோல் கீப்பர் ஸ்ரீஜேஷ் விளையாடாமல் இருந்தார். அவர் தலைமையில் இந்திய அணி கடந்த 2016-ம் ஆண்டு சாம்பியன்ஸ் கோப்பை போட்டியில் வெள்ளி வென்றது. ரியோ ஒலிம்பிக் போட்டிகளிலும் அவர் கேப்டனாக தொடர்ந்தார். மேலும் ஜூனியர் அணியின் கோல்கீப்பர்களான விகாஸ் தாஹியா, கிருஷண் பதக் ஆகியோருக்கு சிறப்பான பயிற்சி அளித்ததால் கடந்த 2016-இல் ஜூனியர் உலகக் கோப்பையும் இந்தியா வசமானது.
கடந்த 2017-ம் ஆண்டு அஸ்லன்ஷா ஹாக்கிப் போட்டியில் ஏற்பட்ட காயம் காரணமாக ஸ்ரீஜேஷ் ஓய்வில் இருந்தார். இந்நிலையில் அவர் மீண்டும் கேப்டனாக நியமிக்கப்பட்டுள்ளார்.
அதே நேரத்தில் ராணி ராம்பால் தலைமையிலான மகளிர் அணி ஆசியக்கோப்பையை வென்றது. 12-ம் இடத்தில் இருந்து தற்போது 10-ம் இடத்துக்கு முன்னேறி உள்ளது. 12 ஆண்டுகளில் முதன்முறையாக கோல்ட்கோஸ்ட் காமன்வெல்த் போட்டி அரையிறுதிக்கு இந்தியா முன்னேறியது குறிப்பிடத்தக்கது.
இது குறித்த செய்திக்குறிப்பில், இந்திய ஆடவர் மற்றும் மகளிர் ஹாக்கி அணிகளின் கேப்டன்களாக ஸ்ரீஜேஷ், ராணி ராம்பால் ஆகியோர் 2018-ம் ஆண்டு இறுதி வரை நியமிக்கப்பட்டுள்ளதாக ஹாக்கி இந்தியாவின் பொதுச் செயலாளர் முகமது முஷ்டாக் அகமது கூறினார்.