சென்னை,

சவுதி அரேபியாவில் அடுத்த ஆண்டு நடைபெறும் ஆசிய கோப்பை கூடைப்பந்து போட்டிக்கான தகுதி சுற்று ஆட்டங்கள் பல்வேறு நாடுகளில் நடந்து வருகிறது. இதில் கலந்து கொண்டுள்ள 24 அணிகள் 6 பிரிவாக பிரிக்கப்பட்டு லீக்கில் மோதுகின்றன. ஒவ்வொரு அணியும் தங்கள் பிரிவில் உள்ள மற்ற அணிகளுடன் உள்ளூர், வெளியூர் அடிப்படையில் 2 முறை மோத வேண்டும். லீக் சுற்று முடிவில் ஒவ்வொரு பிரிவிலும் முதல் 2 இடங்களை பிடிக்கும் அணிகள் நேரடியாக ஆசிய போட்டிக்கு தகுதி பெறும்.

இதில் 'இ' பிரிவில் இடம் பிடித்துள்ள இந்திய அணி தனது 4-வது தகுதி சுற்று ஆட்டத்தில் கஜகஸ்தானை நேற்று சந்தித்தது. இந்த ஆட்டம் சென்னை நேரு ஸ்டேடியத்தில் நடைபெற்றது. விறுவிறுப்பான இந்த ஆட்டத்தில் இந்திய அணி 88-69 என்ற புள்ளி கணக்கில் கஜகஸ்தானை வீழ்த்தி முதல் வெற்றியை பதிவு செய்தது.