லாஸ் வேகாஸ்,

'கிராண்ட்ஸ்லாம்' செஸ் தொடரின் ஒரு அங்கமான பிரீஸ்டைல் சர்வதேச செஸ் போட்டி அமெரிக்காவின் லாஸ் வேகாஸ் நகரில் நடந்தது. இதன் இறுதிப்போட்டியில் அமெரிக்க கிராண்ட்மாஸ்டர் லெவோன் அரோனியன் 1.5-0.5 என்ற புள்ளி கணக்கில் சக நாட்டு வீரர் ஹான்ஸ் மோக் நிமேனை வீழ்த்தி சாம்பியன் பட்டத்தை கைப்பற்றினார். அவருக்கு ரூ.1.72 கோடி பரிசாக வழங்கப்பட்டது.

2-வது இடம் பிடித்த ஹான்ஸ் மோக் நிமோருக்கு ரூ.1.2 கோடி கிடைத்தது. 3-வது இடத்துக்கான ஆட்டத்தில் நம்பர் ஒன் வீரர் மாக்னஸ் கார்ல்சென் (நார்வே) 1.5-0.5 என்ற புள்ளி கணக்கில் அமெரிக்காவின் ஹிகாரு நகமுராவை தோற்கடித்து 3-வது இடத்தை சொந்தமாக்கினார். கார்ல்செனுக்கு ரூ.86 லட்சம் பரிசாக கிட்டியது.

5-வது இடத்துக்கான ஆட்டத்தில் இந்திய வீரர் அர்ஜுன் எரிகைசி 0-2 என்ற புள்ளி கணக்கில் பாபியனோ கருனாவிடம் (அமெரிக்கா) வீழ்ந்து 6-வது இடம் பெற்றார். மற்றொரு ஆட்டத்தில் சென்னையை சேர்ந்த கிராண்ட்மாஸ்டர் பிரக்ஞானந்தா 1.5-0.5 என்ற புள்ளி கணக்கில் வெஸ்லி சோவை (அமெரிக்கா) வீழ்த்தி 7-வது இடத்தை தனதாக்கினார். அர்ஜுன் எரிகைசிக்கு ரூ.34 லட்சமும், பிரக்ஞானந்தாவுக்கு ரூ.25 லட்சமும் பரிசாக கிடைத்தன.