சமர்கண்ட்,
பிடே கிராண்ட் சுவிஸ் செஸ் போட்டி உஸ்பெகிஸ்தானில் உள்ள சமர்கண்ட் நகரில் நடந்து வருகிறது. 11 சுற்றுகள் கொண்ட இந்த போட்டியில் 8-வது சுற்று ஆட்டங்கள் நேற்று நடந்தன. இதில் ஓபன் பிரிவில் நடந்த ஒரு ஆட்டத்தில் இந்தியாவின் நிஹால் சரின், மத்தியாஸ் புளூபாம் (ஜெர்மனி) இடையிலான ஆட்டம் 21-வது நகர்த்தலில் டிராவில் முடிந்தது.
இதே போல் அர்ஜுன் எரிகைசி (இந்தியா) 31-வது நகர்த்தலில் சாந்த் சர்க்சியனுடன் (அர்மேனியா) டிரா செய்தார். தமிழகத்தின் பிரக்ஞானந்தா- ரிச்சர்ட் ராப்போர்ட் (ஹங்கேரி), திவ்யா தேஷ்முக்- குகேஷ் (இருவரும் இந்தியா) இடையிலான மோதலும் டிரா ஆனது.
இதன் மகளிர் பிரிவில் தமிழக வீராங்கனை வைஷாலி 39-வது நகர்த்தலில் பிபிசாரா அஸ்சாபயேவாவிடம் (கஜகஸ்தான்) தோல்வியை தழுவினார். இன்னும் 3 சுற்றுகள் எஞ்சி இருக்கும் நிலையில் கேத்ரினோ லாக்னோ (ரஷியா) 6 புள்ளிகளுடன் முதலிடத்திலும், வைஷாலி 6 புள்ளிகளுடன் 2-வது இடத்திலும் உள்ளனர்.