துபாய்,
துபாயில் கபடி மாஸ்டர்ஸ் சாம்பியன்ஷிப் தொடர் தற்போது நடைபெற்று வருகின்றன. இதில் இந்தியா, பாகிஸ்தான், ஈரான், தென்கொரியா, அர்ஜென்டினா, கென்யா ஆகிய ஆறு அணிகள் பங்கேற்றுள்ளன.
முன்னதாக நடைபெற்ற துவக்க ஆட்டத்தில் பாகிஸ்தானுக்கு எதிராக, இந்தியா 36-20 என்ற புள்ளி கணக்கில் வெற்றி பெற்றிருந்தது.
இந்நிலையில் நேற்று நடைபெற்ற ஆட்டத்தில் இந்தியா மற்றும் கென்யா அணிகள் மோதின. இதில் இந்திய அணியினர் தொடக்கத்திலிருந்தே அதிரடி ஆட்டத்தினை வெளிப்படுத்தினர். இதன்மூலம் முதல் பாதி ஆட்ட நேர முடிவில் 27-9 என்ற புள்ளி கணக்கில் இந்திய அணி முன்னிலை வகித்தது. அதைத் தொடர்ந்து நடைபெற்ற இரண்டாவது பாதியிலும் இந்திய அணியினரின் ஆதிக்கம் தொடர்ந்தது. இறுதியில் இந்திய அணி 48-19 என்ற புள்ளிக்கணக்கில் அபார வெற்றி பெற்றது.
நேற்று நடைபெற்ற மற்றோரு லீக் ஆட்டத்தில் ஈரான் அணி 54-24 என்ற புள்ளிக்கணக்கில் அர்ஜென்டினாவை வீழ்த்தியது. இந்திய அணி, 25-ந் தேதி நடைபெற உள்ள தனது அடுத்த லீக் ஆட்டத்தில் பாகிஸ்தானை எதிர்கொள்கிறது.