சுவோன்,

கொரியா ஓபன் சர்வதேச பேட்மிண்டன் தொடர் தென்கொரியாவில் உள்ள சுவோன் நகரில் நேற்று தொடங்கியது. இதில் ஆண்கள் ஒற்றையர் முதலாவது சுற்று ஆட்டம் ஒன்றில் தரவரிசையில் 34-வது இடம் வகிக்கும் இந்தியாவின் எச்.எஸ். பிரனாய், இந்தோனேசியாவின் சிகோ ஆரா டிவி வார்டோயோவை சந்தித்தார். முதலாவது செட்டில் 8-16 என்ற கணக்கில் பின்தங்கி இருந்த போது பிரனாய், விலா பகுதியில் ஏற்பட்ட காயத்தால் பாதியில் விலகினார்.

மற்றொரு ஆட்டத்தில் கிரண் ஜார்ஜ் (இந்தியா) 14-21, 22-20, 14-21 என்ற செட் கணக்கில் முன்னாள் உலக சாம்பியனான லோக் கீன் யூவிடம் (சிங்கப்பூர்) போராடி பணிந்தார். ஆயுஷ் ஷெட்டி (இந்தியா) 18-21, 18-21 என்ற செட் கணக்கில் சீனதைபேவின் சு லி யாங்கிடம் தோல்வியை தழுவினார்.

இதன் மகளிர் ஒற்றையரிலும் ஏமாற்றமே மிஞ்சியது. அனுபமா உபாத்யாயா 16-21, 15-21 என்ற செட் கணக்கில் புத்ரி வர்தானியிடம் (இந்தோனேசியா) வீழ்ந்தார். கலப்பு இரட்டையரில் இந்தியாவின் மோகித் ஜாக்லான்- லக்‌ஷிதா ஜாக்லன் ஜோடி முதல் சுற்றுடன் நடையை கட்டியது. இத்துடன் இந்த போட்டித் தொடரில் இந்தியாவின் சவால் முடிவுக்கு வந்தது.