செயின்ட் லூயிஸ்,

கிராண்ட் செஸ் சுற்றுப்பயணத்தின் ஒரு அங்கமான சின்கியுபீல்ட் கோப்பை செஸ் போட்டி அமெரிக்காவில் உள்ள செயின்ட் லூயிஸ் நகரில் நடந்து வருகிறது. இதில் நேற்று முன்தினம் இரவு நடந்த 4-வது சுற்று ஆட்டம் ஒன்றில் உலக சாம்பியனான தமிழகத்தை சேர்ந்த குகேஷ்- மேக்சிம் வச்சியர் லக்ரேவ் (பிரான்ஸ்) மோதினர்.

விறுவிறுப்பான இந்த ஆட்டத்தில் வெள்ளைநிற காய்களுடன் ஆடிய குகேஷ் 56-வது நகர்த்தலில் டிரா கண்டார். இதே போல் இந்திய கிராண்ட்மாஸ்டர் பிரக்ஞானந்தா- சாம் செவியன் (அமெரிக்கா) இடையிலான ஆட்டம் 29-வது நகர்த்தலில் டிராவில் முடிந்தது.

மற்றொரு ஆட்டத்தில் கருப்புநிற காய்களுடன் ஆடிய அமெரிக்க வீரர் பாபியானோ கருனா, நோடிர்பெக் அப்துசத்தோரோவை (உஸ்பெகிஸ்தான்) வீழ்த்தினார். அலிரெஜா பிரோவ்ஜா (பிரான்ஸ்)- வெஸ்லி சோ (அமெரிக்கா), ஜன் கிர்சிஸ்போப் டுடா (போலந்து)- லெவொன் அரோனியன் (அமெரிக்கா) இடையிலான ஆட்டங்கள் ‘டிரா’ ஆனது.

9 சுற்றுகள் கொண்ட இந்த போட்டியில் 4-வது சுற்று முடிவில் பாபியானோ கருனா 3 புள்ளிகளுடன் முதலிடத்திலும், லெவொன் அரோனியன், பிரக்ஞானந்தா தலா 2½ புள்ளிகளுடன் 2-வது இடத்திலும் உள்ளனர்.