செயின்ட் லூயிஸ்,

கிராண்ட் செஸ் சுற்றுப்பயணத்தின் ஒரு அங்கமான சின்கியுபீல்ட் கோப்பை செஸ் போட்டி அமெரிக்காவில் உள்ள செயின்ட் லூயிஸ் நகரில் நடந்து வருகிறது.

9 சுற்று கொண்ட இந்த தொடரில் நேற்று முன்தினம் இரவு நடந்த 3-வது சுற்று ஆட்டம் ஒன்றில் தமிழகத்தை சேர்ந்த பிரக்ஞானந்தா, உஸ்பெகிஸ்தானின் நோடிர்பெக் அப்துசத்தோரோவை சந்தித்தார். கருப்புநிற காய்களுடன் ஆடிய பிரக்ஞானந்தா 46-வது நகர்த்தலில் டிரா செய்தார். இதே போல் உலக சாம்பியன் குகேஷ் (இந்தியா)- சாம் செவியன் (அமெரிக்கா) இடையிலான ஆட்டம் 44-வது நகர்த்தலில் டிராவில் முடிந்தது. மற்றொரு ஆட்டத்தில் அமெரிக்காவின் பாபியானோ கருனா 46-வது நகர்த்தலில் அலிரெஜா பிரோவ்ஜாவை (பிரான்ஸ்) தோற்கடித்தார். லெவொன் அரோனியன் (அமெரிக்கா)- மேக்சிம் வச்சியர் லக்ரேவ் (பிரான்ஸ்), வெஸ்லி சோ (அமெரிக்கா)- ஜன் கிர்சிஸ்போப் டுடா (போலந்து) இடையிலான ஆட்டங்கள் ‘டிரா’ ஆனது.

3-வது சுற்று முடிவில் பாபியானோ கருனா, அரோனியன், பிரக்ஞானந்தா ஆகியோர் தலா 2 புள்ளிகளுடன் முதலிடத்தில் உள்ளனர்.