பேட்மிண்டன் தரவரிசையில் சவுரப் வர்மா முன்னேற்றம்

புதுடெல்லி,

சர்வதேச பேட்மிண்டன் சம்மேளனம் புதிய தரவரிசை பட்டியலை நேற்று வெளியிட்டது. இதில் ஆண்கள் ஒற்றையர் தரவரிசையில் இந்திய வீரர் சவுரப் வர்மா 7 இடங்கள் முன்னேறி 29-வது இடத்தை பிடித்துள்ளார். சையத் மோடி சர்வதேச போட்டியில் இறுதிப்போட்டிக்கு வந்ததன் மூலம் இந்த ஏற்றம் கிடைத்துள்ளது. மத்திய பிரதேசத்தை சேர்ந்த 26 வயதான சவுரப் வர்மாவின் சிறந்த தரநிலை இதுவாகும். மற்ற இந்திய வீரர்கள் சாய் பிரனீத் 11-வது இடத்திலும், ஸ்ரீகாந்த் 12-வது இடத்திலும், காஷ்யப் 23-வது இடத்திலும், சமீர் வர்மா 26-வது இடத்திலும், பிரனாய் 27-வது இடத்திலும் மாற்றமின்றி தொடருகிறார்கள். தரவரிசையில் டாப்-30 இடத்திற்குள் 6 வீரர்களை கொண்டுள்ள ஒரே நாடு இந்தியா தான். இந்த வகையில் சீன வீரர்கள் 5 பேர் மட்டுமே உள்ளனர்.

பெண்கள் பிரிவில் இந்தியாவின் பி.வி.சிந்து 6-வது இடமும், சாய்னா நேவால் 10-வது இடமும் வகிக்கிறார்கள்.