உலக பேட்மிண்டன்: இந்திய வீரர்கள் ஸ்ரீகாந்த், லக்‌ஷயா சென் அரைஇறுதிக்கு முன்னேறி அசத்தல்

வெல்வா,

ஆண்கள் ஒற்றையர் பிரிவின் கால்இறுதி ஆட்டம் ஒன்றில் முன்னாள் நம்பர் ஒன் வீரரான இந்தியாவின் கிடாம்பி ஸ்ரீகாந்த் 21-8, 21-7 என்ற நேர் செட்டில் மார்க் கால்ஜோவை (நெதர்லாந்து) பந்தாடி முதல்முறையாக அரைஇறுதிக்குள் நுழைந்தார். மற்றொரு ஆட்டத்தில் இந்திய இளம் வீரர் லக்ஷயா சென் 21-15, 15-21, 22-20 என்ற செட் கணக்கில் சீனாவின் ஜாவ் ஜன் பெங்கை தோற்கடித்து அரைஇறுதிக்கு தகுதி பெற்றார். இந்த வெற்றிக்காக உத்தரகாண்டை சேர்ந்த 20 வயதான லக்ஷயா சென் 1 மணி 7 நிமிடங்கள் போராட வேண்டி இருந்தது.

இன்னொரு ஆட்டத்தில் இந்தியாவின் பிரனாய் 14-21, 12-21 என்ற நேர் செட்டில் லோ கியான் யேவிடம் (சிங்கப்பூர்) வீழ்ந்தார்.

அரைஇறுதியை எட்டியதன் மூலம் ஸ்ரீகாந்த், லக்ஷயா சென் இருவருக்கும் குறைந்தது வெண்கலப்பதக்கம் உறுதியாகியிருக்கிறது. உலக பேட்மிண்டன் வரலாற்றில் இந்திய வீரர்களில் பிரகாஷ் படுகோனே (1983-ம் ஆண்டில் வெண்கலம்), சாய் பிரனீத் (2019-ம் ஆண்டில் வெண்கலம்) ஆகியோர் மட்டுமே பதக்கம் வென்றிருந்தனர். அந்த வரிசையில் ஸ்ரீகாந்தும், லக்ஷயா சென்னும் இணைகிறார்கள். அதே சமயம் இந்திய வீராங்கனைகள் தரப்பில் ஏற்கனவே உலக போட்டியில் 8 பதக்கங்கள் கைப்பற்றப்பட்டு உள்ளன.

தரவரிசையில் 14-வது இடம் வகிக்கும் ஸ்ரீகாந்த் அடுத்து சக நாட்டவரான 19-ம் நிலை வீரர் லக்ஷயா சென்னுடன் இன்று மோதுகிறார். இவர்கள் சர்வதேச போட்டியில் நேருக்கு நேர் சந்திக்க இருப்பது இதுவே முதல் முறையாகும். எது எப்படியென்றாலும் உலக பேட்மிண்டனில் இந்திய வீரர் ஒருவர் முதல்முறையாக இறுதி சுற்றை எட்டுவது உறுதியாகி விட்டது.