இண்டியன்வெல்ஸ் டென்னிஸ்; அதிர்ச்சி தோல்வி கண்ட நோவக் ஜோகோவிச்

கலிபோர்னியா,

இண்டியன்வெல்ஸ் ஓபன் சர்வதேச டென்னிஸ் போட்டி அமெரிக்காவின் கலிபோர்னியாவில் நடந்து வருகிறது. இதில் ஆண்கள் ஒற்றையர் பிரிவில் முன்னணி வீரரான நோவக் ஜோகோவிச் (செர்பியா) நேரடியாக 2-வது சுற்றில் களம் இறங்கினார்.

நேற்று நடைபெற்ற 2வது சுற்று ஆட்டம் ஒன்றில் களம் கண்ட நோவக் ஜோகோவிச், 85-ம் நிலை வீரர் போடிக் வான்டே ஜான்ட்ஸ்சுல்ப்பை (நெதர்லாந்து) சந்தித்தார். இந்த ஆட்டத்தின் முதல் செட்டை 2-6 என்ற புள்ளிக்கணக்கில் இழந்த ஜோகோவிச், 2வது செட்டை 6-3 என்ற புள்ளிக்கணக்கில் கைப்பற்றினார்.

இதையடுத்து வெற்றியாளரை தீர்மானிக்கும் 3வது செட்டில் அபாரமாக செயல்பட்ட போடிக் வான்டே ஜான்ட்ஸ்சுல்ப் 6-1 என்ற புள்ளிக்கணக்கில் ஜோகோவிச்சுக்கு அதிர்ச்சி அளித்தார். இறுதியில் இந்த ஆட்டத்தில் 2-6, 6-3, 1-6 என்ற புள்ளிக்கணக்கில் முன்னணி வீரர் ஜோகோவிச் அதிர்ச்சி தோல்வி கண்டார். ஜோகோவிச்சை வீழ்த்திய போடிக் வான்டே ஜான்ட்ஸ்சுல்ப் அடுத்த சுற்றுக்கு முன்னேறினார்.