மதுராந்தகம்,
காஞ்சீபுரம் மாவட்டம் சூனாம்பேடு சுற்றுவட்டார பகுதிகளில் திருட்டுத்தனமாக வெளிமாநில மது விற்கப்படுவதாக போலீஸ் சூப்பிரண்டு கண்ணனுக்கு ரகசிய தகவல் வந்தது.
இதையடுத்து அவரது உத்தரவின் பேரில் மதுராந்தகம் துணை போலீஸ் சூப்பிரண்டு மகேந்திரன் தலைமையில் சூனாம்பேடு போலீஸ் இன்ஸ்பெக்டர் தரனேஸ்வரி, சப்-இன்ஸ்பெக்டர் திலிப்குமார் மற்றும் போலீசார் சூனாம்பேடு சுற்றுவட்டார பகுதிகளில் திடீர் சோதனையில் ஈடுபட்டனர்.
அப்போது சூனாம்பேடு காலனி பகுதியை சேர்ந்த மேனகா (வயது 30), மல்லீஸ்வரி (40), குட்டி(45), சுப்புலட்சுமி (40), வெண்ணிலா (42) , ஈசூரை சேர்ந்த முனியம்மாள் (42) , இல்லீடு பகுதியை சேர்ந்த புவனேஷ்வரி (35), சேகர் (65) ஆகியோர் 8 பேரும் வீட்டின் அருகே திருட்டுத்தனமாக வெளிமாநில மதுபாட்டில் விற்றது தெரியவந்தது. இதையடுத்து போலீசார் 8 பேரை கைது செய்தனர்.
அவர்களிடம் இருந்து 400 வெளிமாநில மது பாட்டில்களை பறிமுதல் செய்தனர். மது பாட்டில்களின் மதிப்பு ரூ.50 ஆயிரம் ஆகும். கைது செய்யப்பட்ட 8 பேரும் புழல் சிறையில் அடைக்கப்பட்டனர்.