அபுஜா,
நைஜீரியா நாட்டில் ஒரு பக்கம் போகோஹரம் பயங்கரவாதிகள் தாக்குதல்கள் நடத்தி வருகின்றனர்.
இன்னொரு பக்கம் அங்கு ஆயுதக்குழுவினரின் தாக்குதல் அதிகரித்து வருகிறது.
இந்த நிலையில் அங்கு ஜம்பாரா மாகாணத்தில், மோட்டார் சைக்கிள்களில் வந்த ஆயுதக்குழுவினர் 50 பேர், 3 சமூகங்கள் மீது காட்டுமிராண்டித்தனமான தாக்குதல்கள் நடத்தினர். இந்த தாக்குதல்களில் 18 பேர் கொன்று குவிக்கப்பட்டனர். இந்த சம்பவத்தை அந்தப்பகுதியை சேர்ந்த எம்.பி.யான கபீர் மாய் பேலஸ் உறுதி செய்தார்.
ஆயுதக்குழுவினர், 3 சமூகத்தை சேர்ந்தவர்களை வீடுகளில் இருந்து வீதிகளுக்கு இழுத்து வந்து கண்மூடித்தனமாக சுட்டுக்கொன்றதாக தகவல்கள் கூறுகின்றன.
சம்பவ பகுதியில் பாதுகாப்பற்ற நிலைமை மிகப்பெரிய பிரச்சினையாக உருவெடுத்துள்ளது என முகமது பாவா என்பவர் தெரிவித்தார்.
தாக்குதல் நடத்திய ஆயுதக்குழுவினரை தேடும் பணியை போலீசார் மேற்கொண்டுள்ளனர்.