கோவில்பட்டி,
கோவில்பட்டி எட்டயபுரம் ரோடு பகுதியைச் சேர்ந்தவர் சரவணன் (வயது 37). இவர் கோவில்பட்டி மெயின் ரோட்டில் நகைக்கடை நடத்தி வருகிறார். இவர் நேற்று முன்தினம் இரவில் தனது கடையை பூட்டுவதற்கு முன்பாக நகைகளை ஆய்வு செய்தார். அப்போது 10 பவுன் மதிப்பிலான 2 தங்க சங்கிலிகள் மாயமானது தெரிய வந்தது.
உடனே அவர் தனது கடையில் உள்ள கண்காணிப்பு கேமராக்களில் பதிவான காட்சிகளை ஆய்வு செய்தார். இதில் அந்த கடையின் ஊழியரான கோவில்பட்டி ஓதுவார் முடுக்கு தெருவைச் சேர்ந்த மணிகண்டன் (36) 2 தங்க சங்கிலிகளையும் திருடிச் சென்றது தெரிய வந்தது.
இதுகுறித்த புகாரின்பேரில், கோவில்பட்டி கிழக்கு போலீஸ் இன்ஸ்பெக்டர் பவுல்ராஜ் வழக்குப்பதிவு செய்து, மணிகண்டனை கைது செய்து, அவரிடம் இருந்த 2 தங்க சங்கிலிகளையும் பறிமுதல் செய்தார். பின்னர் மணிகண்டனை போலீசார் கோவில்பட்டி முதலாவது ஜூடிசியல் மாஜிஸ்திரேட்டு கோர்ட்டில் ஆஜர்படுத்தி சிறையில் அடைத்தனர்.