சித்ரகுப்த விரதம் இருப்பது எப்படி?

குறிப்பாக வாழ்வின் பாவ புண்ணியங்களை நிர்ணயிக்கும் சித்திரகுப்தரை வழிபட வேண்டிய மிக முக்கியமான நாள் இது. நவக்கிரகங்களில் ஒன்றான கேதுவுக்குரிய பிரத்யேக தேவதையாக சித்ரகுப்தரைக் கூறுவர். சித்ரா பௌர்ணமி நாளில் சித்ரகுப்தரை அர்ச்சித்து பூஜை செய்தால், கேது கிரகத்தால் விளையும் தீமைகள் குறையும்.

ஒவ்வொரு பௌர்ணமிக்கும் ஒரு வகையான விசேஷ பூஜை முறையை காரணாகமம் சொல்லி இருக்கிறது. அவ்வகையில் சித்ரா பௌர்ணமி அன்று மேற்கொள்ளும் ஒரு விரதம் சித்ர குப்த விரதம். விரதம் இருப்பவர்கள் இந்த நாளில் ஒருவேளை உணவிலாவது உப்பை தவிர்த்தால் தீராத கர்ம வினைகள் கூட தீரும் என்பது ஐதீகம். அதேபோல் சித்ரகுப்தருக்கு உப்பு இல்லாத தயிர் சாதம் படைத்து வழிபாடு செய்வது மிகவும் சிறப்பு வாய்ந்தது.

சித்ரகுப்த விரதத்தின்போது காலையில் வீட்டில் மாக்கோலமிட்டு, ஏடு, எழுதுகோல் வைத்து, விளக்கேற்றி பூஜை செய்து சித்ரகுப்தரை வழிபட வேண்டும். அதோடு சர்க்கரைப் பொங்கல் படைத்தும், பயத்தம்பருப்பு, எருமைப்பால் சேர்த்து பாயசம் செய்து நைவேத்தியம் படைக்கவேண்டும். விரதத்தின்போது பசும்பால், நெய், தயிர் ஆகியவற்றை தவிர்க்க வேண்டும்.