நேற்று முன்தினம் எஸ்.பி.பாலசுப்பிரமணியம் உடல்நிலை சீரான நிலையில் உள்ளது என்றும், அவருக்கு தீவிர சிகிச்சை பிரிவில் வைத்து மருத்துவ குழு தொடர்ந்து சிகிச்சை அளித்து வருகிறது என்றும் மருத்துவ அறிக்கையில் கூறப்பட்டது. நேற்று மருத்துவ அறிக்கை வெளியிடப்படவில்லை. அவருக்கு மருத்துவர்கள் தொடர்ந்து தீவிர சிகிச்சை அளித்து வருவதாக ஆஸ்பத்திரி தரப்பில் தெரிவிக்கப்பட்டது.

பொதுமருத்துவம், இருதய நோய், நுரையீரல், தொற்றுநோய் போன்றவற்றில் நிபுணத்துவம் உள்ள மருத்துவ குழு அமைத்து சிகிச்சை அளிக்கப்படுகிறது. அமெரிக்க டாக்டர்கள், மும்பை, டெல்லியை சேர்ந்த மருத்துவர்கள் குழுவினருடன் காணொலி காட்சி மூலம் ஆலோசனை பெற்றும் சிகிச்சை அளிக்கின்றனர்.

எஸ்.பி.பாலசுப்பிரமணியம் ஏற்கனவே உடல் பருமனை குறைக்க அறுவை சிகிச்சை செய்து கொண்டார். தைராய்டு பிரச்சினையும் உள்ளது. வேறு பெரிய அளவில் ஆரோக்கிய பாதிப்பு இல்லை. எனவே சிகிச்சைக்கு அவரது உடல் நிலை ஒத்துழைப்பதாக தெரிவிக்கப்பட்டது.

இந்த நிலையில் லேசான கொரோனா அறிகுறியுடன் வீட்டில் தனிமைப்படுத்தப்பட்ட எஸ்.பி.பாலசுப்பிரமணியத்தின் மனைவி சாவித்திரியும் அதே ஆஸ்பத்திரியில் சிகிச்சைக்கு சேர்க்கப்பட்டு உள்ளார். எஸ்.பி.பாலசுப்பிரமணியம் விரைவில் குணமடைய ரசிகர்களும், திரையுலகி னரும் வலைத்தளத்தில் பதிவுகள் வெளியிடுகிறார்கள்.

நடிகர் கமல்ஹாசன் டுவிட்டரில். அன்பிற்கினிய அன்னைய்யா, உங்களுக்காக நாங்கள் காத்திருக்கிறோம். எனது குரலாக நீங்களும். உமது முகமாக நானும் பல ஆண்டுகள் வாழ்ந்திருக்கிறோம். உங்கள் குரல் இன்னும் ஒலித்திட வேண்டும். மீண்டும் வாருங்கள். தொரகா ரண்டி அன்னைய்யா என்று பதிவிட்டுள்ளார்.