நெல்லை,
நெல்லை டவுனில் பழமைவாய்ந்த கரிய மாணிக்க பெருமாள் கோவில் அமைந்துள்ளது. இங்கு ஆண்டுதோறும் பங்குனி பிரம்மோற்சவ விழா கோலாகலமாக நடைபெறும். அவ்வகையில் இந்த ஆண்டு பங்குனி பிரமோற்சவ விழா கடந்த 15-ந் தேதி கொடியேற்றத்துடன் தொடங்கியது.
விழா நாட்களில் தினமும் பல்வேறு பூஜைகள், சிறப்பு வழிபாடு, திருமஞ்சனம், வீதிஉலா உள்ளிட்ட நிகழ்ச்சிகள் நடைபெற்று வந்தன.
திருவிழாவின் முக்கிய நிகழ்ச்சியான தேரோட்டம் 10-ம் திருநாளான நேற்று காலை நடைபெற்றது. அதிகாலையில் ஸ்ரீதேவி, பூதேவி சமேத கரிய மாணிக்க பெருமாள் சிறப்பு அலங்காரத்தில் தேரில் எழுந்தருளியதும், தேரோட்டம் தொடங்கியது. இதில் திரளான பக்தர்கள் கலந்துகொண்டு பக்தி கோஷங்களுடன் வடம் பிடித்து தேர் இழுத்தனர். தேர் 4 ரத வீதிகளிலும் வலம் வந்து நிலையை அடைந்தது.
இன்று (புதன்கிழமை) குறுக்குத்துறை தாமிரபரணி ஆற்றில் தீர்த்தவாரி நடைபெறுகிறது. மாலையில் சுவாமி, தாயார்கள் பல்லக்கு வீதிஉலாவுடன் விழா நிறைவு பெறுகிறது.