இன்று முதல் மதுக்கடைகள் திறப்பு

இதனை கருத்தில் கொண்டு கர்நாடக அரசு, தனியார் மொத்த விற்பனை கடைகள் மற்றும் அரசின் சில்லரை விற்பனை மதுக்கடைகளை திறக்க முன்வந்துள்ளது. அதாவது மே 4-ந்தேதி (இன்று) முதல் கர்நாடகத்தில் கொரோனா பாதிப்பு அதிகம் உள்ள கட்டுப்படுத்தப்பட்ட பகுதிகளாக அறிவிக்கப்பட்ட இடங்களை தவிர்த்து மற்ற பகுதிகளில் மதுக்கடைகள் திறக்கப்படும் என்று கர்நாடக அரசு உத்தரவிட்டு உள்ளது. அதன்படி இன்று (திங்கட்கிழமை) முதல் காலை 9 மணி முதல் இரவு 7 மணி வரை மதுக்கடைகள் திறக்கப்பட உள்ளது.

கடந்த 39 நாட்களாக மதுக்கடைகள் மூடப்பட்டு கிடந்ததால் விரக்தியில் இருந்து வந்த மது பிரியர்கள் மதுக்கடைகள் திறக்கப்பட உள்ளதால் மகிழ்ச்சி அடைந்துள்ளனர். மதுக்கடைகளில் கூட்டம் கூடுவதை தடுக்கும் வகையிலும், வரிசையில் நின்று மது வாங்கும் வகையிலும் அனைத்து மதுக்கடைகள் முன்பும் கம்புகளால் தடுப்பு வேலிகள் அமைக்கப்பட்டு உள்ளன. அத்துடன் சமூக இடைவெளியை கடைப்பிடிக்க சதுர வடிவிலான கட்டங்களும் சுண்ணாம்பு மூலம் வரையப்பட்டு உள்ளன.

தவம் கிடந்த மதுபிரியர்கள்

இன்று மதுக்கடைகள் திறக்கப்படுவதையொட்டி நேற்று மாலையே பெங்களூரு, கோலார், சாம்ராஜ்நகர், மண்டியா, ராய்ச்சூர், பெலகாவி, யாதகிரி, ஹாவேரி உள்பட ஒரு சில இடங்களில் மதுக்கடைகள் முன்பு ஏராளமானோர் குவிந்த வண்ணம் உள்ளனர். அவர்கள் சமூக இடைவெளியுடன் நின்ற படியும், தரையில் அமர்ந்தபடியும் இருந்ததை காண முடிந்தது. மதுவுக்காக மதுக்கடை முன்பு தவம் கிடந்தவர்களை போலீசார் எச்சரித்து அனுப்பினர்.

பெங்களூருவில் வர்த்தக நிறுவனங்கள் அதிகமுள்ள சிக்பேட்டை மார்க்கெட் அருகில் பழைய பேட்டை பகுதியில் உள்ள மதுக்கடை முன்பு இருந்து சுமார் ஒரு கிலோ மீட்டர் தூரத்திற்கு முதியவர்கள், இளைஞர்கள் நீண்ட வரிசையில் நின்றிருந்தனர். அவர்கள் மது வாங்க அங்கு குவிந்திருப்பதாக தகவல் வெளியானது. இதுபற்றி அறிந்த போலீசார் அங்கு சென்று விசாரித்தனர். அப்போது அவர்கள் மது வாங்க வரவில்லை என்றும், அந்த மதுக்கடை அருகில் உள்ள கம்ப்யூட்டர் மையத்தில் வருகிற 17-ந்தேதிக்கு பிறகு ரெயில் டிக்கெட் ஆன்-லைன் முன்பதிவு செய்ய குவிந்ததும் தெரியவந்தது.

பூஜை நடத்தி தேங்காய் உடைத்தனர்

இதற்கிடையே இன்று மதுக்கடை திறக்க உள்ளதால் மகிழ்ச்சியில் திளைத்த சாம்ராஜ்நகர் (மாவட்டம்) டவுனை சேர்ந்த ஒருவர், கர்நாடக அரசின் சில்லரை மதுபானக்கடையான எம்.எஸ்.ஐ.எல். கடைக்கு மோட்டார் சைக்கிளில் வந்தார். அவர் தனது முகத்தை முழுவதுமாக துணியால் மூடியபடி இருந்தார். அவர் தான் கையில் எடுத்து வந்த தேங்காய், பழம், வெற்றிலை, பாக்குகளை மதுக்கடை முன்பு வைத்தார். பின்னர் ஊதுவர்த்தி ஏற்றி சிறப்பு பூஜை செய்தார். பின்னர் தேங்காயை கடை முன்பு உடைத்துவிட்டு அங்கிருந்து மின்னல் வேகத்தில் மோட்டார் சைக்கிளில் சென்றார்.

இதுபோல் கோலார் மாவட்டம் பங்காருப்பேட்டை தாலுகா பூதிக்கோட்டை கிராமத்தில் உள்ள ஒரு மதுக்கடை முன்பு வந்த 45 வயது மதுபிரியர் ஒருவரும் சிறப்பு பூஜை செய்து கற்பூரம் ஏற்றி தேங்காயை உடைத்து வழிபட்டார்.

மைசூருவில் பரபரப்பு

இந்த நிலையில் மைசூருவில் உள்ள அரசு சில்லரை விலை மதுக்கடைகளில் கர்நாடக அரசின் மதுபான கழக அதிகாரிகள் திடீரென்று சோதனை நடத்தினர். அவர்கள், மதுபானங்கள் இருப்பு விவரங்களை சரிபார்த்தனர்.

மேலும் காலாவதியான பீர் உள்பட மதுபானங்கள் இருப்பு உள்ளதா எனவும் சோதனையிட்டனர். ஆனால் மதுக்கடை திறந்திருப்பதாக கூறி ஏராளமானோர் மதுவாங்க அங்கு குவிந்தனர். அவர்களை பாதுகாப்பு பணியில் ஈடுபட்டிருந்த போலீசார் அங்கிருந்து கலைந்துபோக செய்தனர். இதனால் அந்தப் பகுதியில் பரபரப்பு ஏற்பட்டது.