சில ஆண்டுகளுக்கு முன்பு கோடை காலம் வந்து விட்டால் பல்வேறு மாவட்டங்களில் இருந்தும், பல மாநிலங்களில் இருந்தும் தேனி மாவட்டத்தை நோக்கி சுற்றுலா பயணிகள் படையெடுத்து வருவார்கள். அந்த அளவுக்கு குளு,குளுவென இந்த மாவட்டப் பகுதிகள் திகழ்ந்தது. ஆனால், தற்போது கோடை காலம் வந்து விட்டால் குளிர்ச்சியான இடம் தேடி எங்கே செல்லலாம்? என்று தேனி மாவட்ட மக்களே எண்ணும் அளவுக்கு நிலைமை தலைகீழாக மாறி உள்ளது. இங்குள்ள வனப் பகுதிகள் வளம் இழந்துள்ளதும், சாலை விரிவாக்கம், குடியிருப்பு விரிவாக்கம் என்ற பெயரில் லட்சக்கணக்கான மரங்களை கடந்த 10 ஆண்டுகளில் இழந்து விட்டதும் முக்கிய காரணங்கள் ஆகும். கோடையிலும் தண்ணீர் கொட்டும் சுருளி அருவி கடந்த மாதமே வறண்டு விட்டது. கும்பக்கரை அருவியும் வறட்சியின் பிடியில் தான் சிக்கி உள்ளது. மலையடிவார பகுதிகளில் காட்டாறுகள், நீரோடைகள் வறண்டு கிடக்கின்றன. இவ்வாறு பசுமையை இழந்து விட்டதால், வெயிலின் தாக்கம் அதிகரித்து உள்ளது.

மார்ச், ஏப்ரல், மே மாதங்கள் கோடை காலம் ஆகும். மார்ச் மாதம் தொடங்கி உள்ள நிலையில், தற்போதே கோடை வெயில் சுட்டெரிக்கத் தொடங்கி விட்டது. காலை 9 மணிக்கே வெயிலின் தாக்கம் அதிக அளவில் உள்ளது. இந்த வெயிலினால் மாலை 5 மணி வரை கடுமையான வெப்பத்தை உணர முடிகிறது.