முக்கூடல்,
நெல்லை மாவட்டம் முக்கூடல் பூவையா தெருவை சேர்ந்தவர் ராமலிங்கம். மும்பையில் டிரைவராக வேலை பார்த்து வருகிறார். அவருடைய மனைவி ராமலட்சுமி. இவர்களுக்கு அருணாஸ்ரீ (வயது 15), கிருஷ்ணவேணி ஆகிய 2 மகள்கள். 10-ம் வகுப்பு மாணவியான அருணாஸ்ரீ தற்போது பள்ளிக்கூட விடுமுறையில் உள்ளார். அவர் தினமும் வீட்டு வேலைகளை தாமதமாக செய்ததாக கூறப்படுகிறது.
இதனை நேற்று காலை ராமலட்சுமி கண்டித்துள்ளார். பின்னர் ராமலட்சுமி வெளியே சென்றுவிட்டு வீடு திரும்பியபோது கதவு உள்பக்கமாக பூட்டப்பட்டிருந்து. பலமுறை மகளை அழைத்தும் சத்தம் எதுவும் இல்லாததால் அதிர்ச்சியடைந்தார்.
உடனடியாக அக்கம்பக்கத்தினரின் உதவியுடன் கதவை உடைத்து உள்ளே சென்று பார்த்தபோது, சேலையால் அருணாஸ்ரீ தூக்கில் தொங்கியது தெரியவந்தது. இதையடுத்து அவரை உடனடியாக மீட்டு முக்கூடல் அரசு ஆஸ்பத்திரிக்கு கொண்டு சென்றனர். அங்கு டாக்டர் பரிசோதித்தபோது, அவர் ஏற்கனவே இறந்துவிட்டதாக தெரிவித்தார்.
இதுபற்றிய தகவல் அறிந்ததும் முக்கூடல் போலீசார் சம்பவ இடத்துக்கு வந்தனர். அருணாஸ்ரீ உடலை கைப்பற்றி பிரேத பரிசோதனைக்காக பாளையங்கோட்டை ஐகிரவுண்டு அரசு ஆஸ்பத்திரிக்கு அனுப்பி வைத்தனர். போலீசார் வழக்குப்பதிவு செய்து வேறு ஏதேனும் காரணங்கள் உள்ளதா? என விசாரணை நடத்தி வருகின்றனர்.
10-ம் வகுப்பு மாணவி தற்கொலை செய்து கொண்ட சம்பவம் அப்பகுதியில் பெரும் பரபரப்பையும், சோகத்தையும் ஏற்படுத்தி உள்ளது.