காக்காபாளையம் பஸ் நிறுத்தம் பகுதியில் சேலம்- கோவை தேசிய நெடுஞ்சாலையில் விடுதலை சிறுத்தைகள் கட்சி மேற்கு மாவட்ட செயலாளர் அய்யாவு தலைமையில் கட்சியினர் சாலைமறியலில் ஈடுபட்டனர். மறியலில் ஈடுபட்டவர்களை மகுடஞ்சாவடி போலீசார் கைது செய்து. அப்பகுதியில் உள்ள தனியார் திருமண மண்டபத்தில் தங்க வைத்தனர்.

ஆத்தூர் பஸ் நிலையம் முன்பு விடுதலை சிறுத்தை கட்சி கிழக்கு மாவட்ட செயலாளர் முத்து தலைமையில் சாலைமறியல் போராட்டம் நடந்தது. செய்தி தொடர்பாளர் நாராயணன், செல்வம், சாமுண்டி உள்ளிட்ட 36 பேரை ஆத்தூர் போலீஸ் இன்ஸ்பெக்டர் கேசவன் கைது செய்து ஒரு திருமண மண்டபத்தில் தங்க வைத்தார்.

இதேபோல் ஆத்தூர் பஸ் நிலையம் அருகில் மறியலில் ஈடுபட்ட பாப்புலர் பிரண்ட் ஆப் இந்தியா அமைப்பை சேர்ந்த 22 பேர் கைது செய்யப்பட்டனர். மேலும் ஆத்தூர் பஸ் நிலையம் அருகில் திராவிடர் கழக மாவட்ட தலைவர் வானவில் தலைமையிலும் ஆர்ப்பாட்டம் நடைப்பெற்றது.

தம்மம்பட்டி அருகே உள்ள செந்தாரப்பட்டியில் திருமாவளவன் கைது செய்யப்பட்டதை கண்டித்து அங்குள்ள பஸ்நிலையம் முன்பு விடுதலை சிறுத்தைகள் கட்சியினர் ஆர்ப்பாட்டம் நடத்தினர். ஆர்ப்பாட்டத்திற்கு கெங்கவல்லி சட்டமன்ற தொகுதி துணை செயலாளர் கக்கன்செல்வகுமார் தலைமை தாங்கினார். இதில் நகர செயலாளர் ரமேஷ் அம்பேத்வளவன், பெருமாள், ரமேஷ், ஆறுமுகம், செல்வகுமார், காசிராஜன் உள்பட 40 பேர் கலந்து கொண்டனர்.