நாடு முழுவதும் கொரோனா வைரஸ் தொற்று தலைவிரித்தாடுகிறது. கொரோனா சிகிச்சையில் ஆக்சிஜன் முக்கிய பங்கு வகிப்பதால் அதன் தேவை அதிகரித்து வருவதே இதற்கு காரணம். டெல்லி உள்ளிட்ட சில மாநிலங்களில் ஆக்சிஜன் பற்றாக்குறையால் நோயாளிகள் மரணத்தை தழுவும் அவலத்தையும் காண முடிகிறது. இதையடுத்து அனைத்து மாநிலங்களிலும் ஆக்சிஜன் இருப்பு குறித்து ஆய்வுசெய்து உற்பத்தியை அதிகரிக்க உத்தரவிடப்பட்டது.

இந்தநிலையில் புதுச்சேரி அரசு சுகாதாரத்துறை செயலர் அருண் தனியார் மருத்துவக் கல்லூரிகள் மற்றும் அரசு மருத்துவ கல்லூரியின் மயக்க மருந்து மருத்துவர்களுடன் நேற்று ஆலோசனை நடத்தினார். இதில் சுகாதாரத்துறை இயக்குனர் மோகன்குமார், அரசு மற்றும் தனியார் மருத்துவக்கல்லூரி மருத்துவமனையில் பணிபுரியும் மயக்க மருந்து மருத்துவர்கள் பலர் கலந்து கொண்டனர்.