நாடாளுமன்ற தேர்தலில் ஜனதா தளம்(எஸ்) கட்சியுடன் கூட்டணி அமைத்து போட்டியிட காங்கிரஸ் முடிவு செய்துள்ளது. கூட்டணி தொடர்பாக இரு கட்சிகளின் தலைவர்களும் வருகிற 4-ந் தேதி (அதாவது நாளை) ஆலோசனை நடத்த உள்ளனர். அப்போது தொகுதி பங்கீடு குறித்து பேச்சு வார்த்தை நடத்தி இறுதி முடிவு எடுக்கப்படும். அதன்பிறகு, தேர்தலில் போட்டியிடும் வேட்பாளர்கள் யார்-யார்? என்பது இறுதி செய்யப்படும். தேர்தலில் போட்டியிட அனைவரும் விரும்பினாலும், வெற்றி பெறுபவர்களை கண்டறிந்து, அவர்களுக்கே சீட் கொடுக்கப்படும்.

மண்டியா தொகுதியில் போட்டியிட சுமலதா அம்பரீஷ் ஆர்வம் காட்டி வருகிறார். நடிகர் அம்பரீஷ் காங்கிரஸ் கட்சியின் மூத்த தலைவராக இருந்தவர். தற்போது காங்கிரஸ், ஜனதாதளம்(எஸ்) கட்சிகள் கூட்டணி அமைத்திருப்பதால் மண்டியா தொகுதி யாருக்கு ஒதுக்கப்படும் என்பது இன்னும் முடிவாகவில்லை. மண்டியா தொகுதி யாருக்கு ஒதுக்கப்படும் என்று கூட்டணி கட்சி தலைவர்கள் முடிவு செய்த பின்பு, அங்கு வேட்பாளராக யாரை நிறுத்துவது என்பது பற்றி தீர்மானிக்கப்படும்.

மண்டியா தொகுதியில் முதல்-மந்திரி குமாரசாமியின் மகன் நிகில் கவுடா போட்டியிடுவார் என்று மந்திரி ஜி.டி.தேவேகவுடா கூறியுள்ளார். அந்த தொகுதியில் போட்டியிடுவது யார்? என்பது பற்றி முன்னாள் பிரதமர் தேவேகவுடா எதுவும் கூறவில்லை.

நாடாளுமன்ற தேர்தலில் காங்கிரஸ், ஜனதாதளம்(எஸ்) கூட்டணி கட்சிகள் 20-க்கும் மேற்பட்ட தொகுதிகளில் வெற்றி பெறுவது உறுதி. மத்தியில் காங்கிரஸ் கட்சி ஆட்சியை பிடிக்கும். பிரதமராக ராகுல்காந்தி பொறுப்பு ஏற்பார்.

இவ்வாறு தினேஷ் குண்டுராவ் கூறினார்.