நாட்டில் கொரோனா வைரஸ் நோய் தீவிரமாக பரவி வரும் நிலையில் முன்னெச்சரிக்கையாக அரசு பல்வேறு நடவடிக்கைகளை எடுத்து வருகிறது. இந்த நிலையில் கானாடுகாத்தான் பேரூராட்சி பகுதிகளில் கொரோனா வைரஸ் விழிப்புணர்வு நிகழ்ச்சி நடைபெற்றது. இதில் அலுவலர் ரமேஷ், ஆரம்ப சுகாதார நிலைய சித்தா டாக்டர் பிரீத்தா மற்றும் பேரூராட்சி பணியாளர்கள் கலந்துகொண்டு பொதுமக்களுக்கு கைகளை கழுவும் முறை குறித்து செயல்முறை பயிற்சி அளித்தனர். பள்ளி, கல்லூரி மாணவ-மாணவிகள், டிரைவர்கள், பொதுமக்களுக்கு கொரோனா வைரஸ் குறித்து விழிப்புணர்வு பிரசாரம் மேற்கொள்ளப்பட்டது. மேலும் பஸ் நிலையம், பள்ளிக்கூடங்கள், வழிபாட்டு தலங்கள், ஏ.டி.எம். மையம், அரசு பஸ்கள், சுகாதார வளாகங்கள் ஆகியவற்றில் கிருமிநாசினி மருந்து தெளிக்கப்பட்டது.

மேலும் இளையான்குடி அருகே சாலைக்கிராமத்தில் ஊராட்சி மன்ற தலைவர் தங்கம் மற்றும் துப்புரவு ஆய்வாளர், ஊராட்சி மன்ற உறுப்பினர்கள் தலைமையில் பஸ் நிலையம் மற்றும் பயணிகள் நிழற்குடை, அரசு அலுவலகங்கள் உள்ளிட்ட இடங்கள் மற்றும் பஸ்களில் கிருமி நாசினி மருந்து தெளிக்கப்பட்டது. மேலும் பொதுமக்கள், பள்ளி, கல்லூரி மாணவர்களுக்கு கொரோனா வைரஸ் விழிப்புணர்வு நிகழ்ச்சி நடைபெற்றது. துண்டு பிரசுரங்கள் வழங்கி விழிப்புணர்வு ஏற்படுத்தப்பட்டது. மேலும் நூறு நாள் வேலை திட்டத்தில் பணியாற்றி வருபவர்களுக்கும், அலுவலக பணியாளர்களுக்கும் முகக்கவசம் வழங்கப்பட்டது.