தேவாரம் பேரூராட்சி மன்ற முதல் கூட்டம் நேற்று பேரூராட்சி அலுவலகத்தில் நடந்தது. இதற்கு தலைவர் லட்சுமி பால்பாண்டியன் தலைமை தாங்கினார். செயல் அலுவலர் குலோத்துங்கன், துணைத்தலைவர் சிவக்குமார் ஆகியோர் முன்னிலை வகித்தனர். கூட்டத்தில் தி.மு.க., அ.தி.மு.க., அ.ம.மு.க. ஆகிய கட்சிகளை சேர்ந்த கவுன்சிலர்கள் மற்றும் சுயேச்சை கவுன்சிலர்கள், தேவாரம் போலீஸ் இன்ஸ்பெக்டர் ராஜேந்திரன் ஆகியோர் கலந்து கொண்டனர்.

கூட்டத்தில் முக்கிய தீர்மானங்களை தலைவர் வாசித்தார். அதில் தேவாரம் அருகே உள்ள அம்பரப்பர் மலையில் நியூட்ரினோ ஆய்வு மையம் அமைக்க கூடாது என்று முதல்-அமைச்சர் மு.க.ஸ்டாலின், பிரதமர் மோடிக்கு கடிதம் அனுப்பியுள்ளார். இதற்கு முதல்-அமைச்சருக்கு நன்றி தெரிவிக்கிறோம். மேலும் நியூட்ரினோ திட்டத்தை மத்திய அரசு கைவிட வேண்டும் என்று வலியுறுத்துவதாக கூறினார். இதற்கு அனைத்து கவுன்சிலர்களும் ஒருமனதாக தீர்மானத்தை ஒப்புதல் அளிப்பதாக கூறினர்.