கயத்தாறு உச்சினிமாகாளி அம்மன் கோவில் தெருவில் உள்ள ஒரு வீட்டில் நேற்று மதியம் ஆழ்குழாய் கிணறு அமைக்க ஏற்பாடு செய்யப்பட்டது. இதற்காக ஆழ்குழாய் கிணறு அமைக்கும் எந்திரத்துடன் கூடிய லாரியை வரவழைத்தனர். தொடர்ந்து அங்கு ஆழ்குழாய் கிணறு அமைக்கும் பணி நடந்தது. அப்போது அந்த லாரியின் ஜெனரேட்டர், கம்பிரஷர் எந்திரங்களில் திடீரென்று தீப்பிடித்தது. அப்போது காற்று பலமாக வீசியதால் மளமளவென்று தீப்பற்றி எரிந்தது. உடனே லாரி டிரைவரான திருச்சியைச் சேர்ந்த பாண்டியன் (வயது 50) சாமர்த்தியமாக அந்த லாரியை சுமார் 200 மீட்டர் தூரம் மெதுவாக ஓட்டிச் சென்று, ஊருக்கு ஒதுக்குப்புறமான காட்டு பகுதியில் நிறுத்தி விட்டு, லாரியில் இருந்து கீழே குதித்து தப்பினார். சிறிதுநேரத்தில் லாரி முழுவதும் தீப்பிடித்து எரிந்தது.பெரும் விபத்து தவிர்ப்பு

இதுகுறித்து தகவல் அறிந்ததும், கழுகுமலை தீயணைப்பு நிலைய வீரர்கள் விரைந்து சென்று தண்ணீரை பீய்ச்சி அடித்து தீயை அணைத்தனர். தீ விபத்தில் ஆழ்குழாய் கிணறு அமைக்கும் லாரி முழுவதும் எரிந்து சேதம் அடைந்தது. இதன் மதிப்பு சுமார் ரூ.20 லட்சம் ஆகும். இதுகுறித்து கயத்தாறு போலீசார் விசாரணை நடத்தி வருகின்றனர்.