பெங்களூரு,

கடந்த 2016-ம் ஆண்டு நடந்த டெல்லி மேல்-சபை தேர்தலில் ஜனதாதளம் (எஸ்.) கட்சி வேட்பாளர் பாரூக்குக்கு எதிராக எம்.எல்.ஏ.க்களான ஜமீர் அகமது கான், செலுவராயசாமி, இக்பால் அன்சாரி உள்ளிட்ட 7 பேரும் காங்கிரசுக்கு ஓட்டுபோட்டனர். இதைத்தொடர்ந்து கட்சி கொறடா உத்தரவை மீறியதாக 7 எம்.எல்.ஏ.க்கள் கட்சியில் இருந்து இடைநீக்கம் செய்யப்பட்டனர். அவர்களது பதவியை பறிக்க சபாநாயகரிடம் புகார் அளிக்கப்பட்டு உள்ளது. மேலும் கட்சி சார்பில் கர்நாடகா ஐகோர்ட்டில் வழக்கும் நடந்து வருகிறது.

இந்த நிலையில் நேற்றுமுன்தினம் நடந்த டெல்லி மேல்-சபை தேர்தலிலும் காங்கிரஸ் வேட்பாளருக்கே 7 பேரும் ஓட்டுபோட்டனர். இதுபற்றி அக்கட்சி சார்பில் சபாநாயகரிடம் புகார் அளிக்கப்பட்டு உள்ளது.

இதற்கிடையே அதிருப்தி எம்.எல்.ஏ.க்கள் 7 பேரும் அடுத்தடுத்து சபாநாயகர் கோலிவாட்டை சந்தித்து தங்களது பதவிகளை ராஜினாமா செய்வதாக கடிதம் கொடுத்தனர். அதை சபாநாயகர் ஏற்றுக் கொண்டதாக அறிவித்து உள்ளார்.

இதுபற்றி செலுவராயசாமி கூறுகையில் கட்சி இடைநீக்கம் செய்ததால் 7 பேரும் ராஜினாமா செய்து உள்ளோம். பொதுக்கூட்ட நிகழ்ச்சிக்காக கர்நாடகம் வந்துள்ள அகில இந்திய காங்கிரஸ் கட்சி தலைவர் ராகுல்காந்தி முன்னிலையில் நாங்கள் இன்று(ஞாயிறு) காங்கிரசில் இணைய முடிவு செய்துள்ளோம் என்றார்.