மும்பையில் நடந்த சோதனையில், மாவோயிஸ்டு ஆதரவாளர்கள் வெர்னன் கோன்சல்வ்ஸ், அருண் பெரேரா, டெல்லியில் நடந்த சோதனையில் சிவில் உரிமை ஆர்வலர் கவுதம் நவலகா ஆகியோர் கைது செய்யப்பட்டனர். இந்த நடவடிக்கைகளுக்கு, காங்கிரஸ் கட்சி கண்டனம் தெரிவித்துள்ளது. அக்கட்சியின் செய்தித்தொடர்பாளர் ஜெய்பால் ரெட்டி கூறுகையில், இந்த கைதை கண்டிக்கிறோம். உரிய குற்றச்சாட்டு இல்லாமல், எந்த மனித உரிமை ஆர்வலரையும் கைது செய்யக்கூடாது என்றார். மேலும், பெண் எழுத்தாளர் அருந்ததி ராய், பிரபல வரலாற்று ஆய்வாளர் ராமச்சந்திர குகா உள்ளிட்டோர் மத்திய அரசுக்கு கண்டனம் தெரிவித்துள்ளனர்.

இவ்விவகாரம் தொடர்பாக சுப்ரீம் கோர்ட்டில் வழக்கும் தொடரப்பட்டுள்ளது. இதற்கிடையே ஐவர் கைது செய்யப்பட்ட விவகாரம் தொடர்பாக மத்திய உள்துறை அமைச்சகத்திற்கு மராட்டிய மாநில அரசு விளக்கமளித்துள்ளது. புலனாய்வு அமைப்புகள் கொடுத்த தகவல்களின்படியே கைது நடவடிக்கை மேற்கொள்ளப்பட்டுள்ளது என மராட்டிய மாநில அரசு தெரிவித்துள்ளது. மராட்டிய உள்துறை அமைச்சர் தீபக் கேசர்கார் பேசுகையில், ஆதாரங்கள் இல்லாமல் போலீஸ் நடவடிக்கையை எடுக்காது. ஆதாரம் கோர்ட்டில் சமர்பிக்கும் போது நீதிமன்றம் காவலில் அனுப்பும். அவர்கள் எப்படி நக்சலிசத்திற்கு உதவுகிறார்கள் என்பது தொடர்பாக எங்களிடம் ஆதாரம் உள்ளது. அவர்கள், அவர்களுக்கென்று தனி அரசை இயக்குகிறார்கள், இது எப்படி ஜனநாயகத்திற்கு சிறந்ததாக இருக்கும்? என கேள்வியை எழுப்பியுள்ளார்.