2018-ஆம் ஆண்டுக்கான பாராளுமன்ற பட்ஜெட் கூட்டத் தொடர் கடந்த ஜனவரி மாதம் 29ஆம் தொடங்கியது. இக்கூட்டத் தொடர் 2 பகுதிகளாக நடைபெறுகிறது. இதில் முதல் பகுதி கடந்த பிப்ரவரி மாதம் 9ஆம் தேதி வரை நடைபெற்றது. அக்காலக்கட்டத்தில் மத்திய பட்ஜெட், ரயில்வே பட்ஜெட் ஆகியவை மத்திய அரசால் தாக்கல் செய்யப்பட்டன.

இதையடுத்து, பாராளுமன்ற இருஅவைகளும் கடந்த மாதம் 9ஆம் தேதி ஒத்திவைக்கப்பட்டது. இதைத்தொடர்ந்து, 2-ஆவது அமர்வு இன்று (மார்ச் 5) தொடங்கி ஏப்ரல் மாதம் 6-ஆம் தேதி வரை நடைபெறுகிறது இந்த அமர்வில், பொருளாதார குற்றங்களில் ஈடுபட்டு விட்டு வெளிநாட்டுக்கு தப்பியோடும் நபர்களின் சொத்துகளை முடக்க வழிவகை செய்யும் மசோதா, மாநிலங்களவையில் நிறைவேற்றப்படாமல் இருக்கும் முத்தலாக் தடை மசோதா, ஒபிசி ஆணையத்துக்கு சட்ட ரீதியில் அங்கீகாரம் அளிக்கும் வகையில் கொண்டு வரப்பட்டுள்ள ஒபிசி மசோதா ஆகியவற்றை எப்படியாவது நிறைவேற்றி விட வேண்டும் என்ற முனைப்பில் மத்திய பாஜக கூட்டணி அரசு உள்ளது.