புதுடெல்லி,
தலைநகர் டெல்லியில் கடந்த சில மாதங்களாக கொரோனா வைரஸ் தொற்று பாதிப்பு எண்ணிக்கை இரட்டை இலக்க எண்களிலேயே பதிவாகி வருகிறது. அந்த வகையில், கடந்த 24 மணி நேரத்திலும் தொற்று பாதித்தவர்கள் எண்ணிக்கை 30- ஆக பதிவானது. தொற்று பாதிப்பு விகிதம் 0.05 சதவிகிதமாக குறைந்துள்ளது. டெல்லியில் இதுவரை கொரோனா பாதித்தவர்கள் எண்ணிக்கை 14 லட்சத்து 40 ஆயிரத்து 605- ஆக அதிகரித்துள்ளது.
தொற்றில் இருந்து 14.15- லட்சம் பேர் இதுவரை குணம் அடைந்துள்ளனர். கொரோனா தொற்று பாதிப்பால் இன்று புதிதாக உயிரிழப்பு எதுவும் பதிவாகவில்லை. இதுவரை உயிரிழந்தவர்கள் எண்ணிக்கை 25,095- ஆக நீடிக்கிறது. நடப்பு மாதத்தில் கொரோனா தொற்று பாதிப்பு உயிரிழந்தவர்கள் எண்ணிக்கை 4 ஆகும். நவம்பர் 12 ஆம் தேதி இருவரும் , 14 மற்றும் 15 ஆம் தேதிகளில் தலா ஒருவரும் தொற்று பாதிப்பால் உயிரிழந்து இருந்தனர். அதன்பிறகு ஆறுதல் அளிக்கும் விதமாக இதுவரை உயிரிழப்பு எதுவும் ஏற்படவில்லை.