புதுடெல்லி,
நாட்டில் கொரோனா பாதிப்புகளுக்கு பின்னர் சரக்கு மற்றும் சேவை வரி வருவாய் பாதிப்படைந்தது. நடப்பு ஆண்டில் ஜூலை, ஆகஸ்டு மற்றும் செப்டம்பரில் முறையே -14%, -8% மற்றும் 5% என்ற அளவில் வரி வருவாய் சரிவை சந்தித்திருந்தது.
இந்நிலையில், ஆச்சரியமூட்டும் வகையில் நடப்பு ஆண்டு அக்டோபரில் முதன்முறையாக ஜி.எஸ்.டி. வருவாய் ஆனது கடந்த பிப்ரவரிக்கு பின் ரூ.1 லட்சம் கோடியை எட்டியுள்ளது. இதன்படி, ஜி.எஸ்.டி. மொத்த வருவாய் ரூ.1 லட்சத்து 5 ஆயிரத்து 155 கோடியாக உயர்ந்து உள்ளது.
இவற்றில் சி.ஜி.எஸ்.டி. ரூ.19,193 கோடியாகவும், எஸ்.ஜி.எஸ்.டி. ரூ.25,411 கோடியாகவும், ஐ.ஜி.எஸ்.டி. ரூ.52,540 கோடியாகவும் உள்ளது. கடந்த ஆண்டு இதே காலகட்டத்தில் கிடைத்த ஜி.எஸ்.டி. வருவாயை விட இந்த ஆண்டு அக்டோபரில் 10% வருவாய் வளர்ச்சியை எட்டியுள்ளது.
இதேபோன்று கடந்த ஆண்டு இதே அக்டோபர் மாதத்தில் முடிவடைந்த காலகட்டத்துடன் ஒப்பிடும்பொழுது, நடப்பு அக்டோபரில் சரக்குகளை இறக்குமதி செய்த வகையில் கிடைத்த வருவாய் 9% அளவுக்கு உயர்ந்தும், உள்நாட்டு பரிமாற்றம் வகையில் (இறக்குமதி சேவை உள்பட) 11% அளவுக்கு வருவாய் உயர்ந்தும் உள்ளது. கடந்த செப்டம்பரில் ஜி.எஸ்.டி. வரி வருவாய் ரூ.95,480 கோடியாக இருந்தது.