புதுடெல்லி,

இந்தியாவில் நிலவும் பொருளாதார மந்தநிலைக்கு மத்தியில் உள்ள பாரதீய ஜனதா கூட்டணி அரசின் தவறான கொள்கைகளே காரணம் என்று காங்கிரஸ் குற்றம்சாட்டி இருக்கிறது.

அத்துடன் குடியுரிமை சட்ட திருத்தத்தை கண்டித்து இருப்பதோடு, வேலையில்லா திண்டாட்டம், விவசாயிகள் பிரச்சினை ஆகியவற்றுக்கும் மத்திய அரசின் தவறான அணுகு முறையே காரணம் என்று கூறி உள்ளது.

இந்த நிலையில், இந்தியாவை பாதுகாப்போம் என்ற பெயரில் நேற்று டெல்லியில் உள்ள ராம்லீலா மைதானத்தில் காங்கிரஸ் கட்சியின் சார்பில் பல்லாயிரக் கணக்கானோர் கலந்து கொண்ட பிரமாண்ட பொதுக்கூட்டம் நடைபெற்றது. இதில் டெல்லியில் இருந்து மட்டுமல்லாமல் பல்வேறு மாநிலங்களில் இருந்தும் வந்திருந்த காங்கிரஸ் நிர்வாகிகள் மற்றும் தொண்டர்கள் கலந்து கொண்டனர்.

முன்னதாக காங்கிரஸ் தலைமை அலுவலகம், ரெயில் நிலையம், பாராகம்பா ரோடு உள்ளிட்ட பகுதிகளில் இருந்து அவர்கள் பேரணியாக மைதானத்துக்கு வந்தனர்.