ஜனாதிபதி திரவுபதி முர்முவை எதிர்க்கட்சிகள் (I.N.D.I.A.) கூட்டணியினர் நாளை சந்திக்க உள்ள நிலையில், உள்துறை மந்திரி அமித்ஷா இன்று மரியாதை நிமித்தமாக அவரை சந்தித்துப் பேசினார். ஜனாதிபதி மாளிகையில் இந்த சந்திப்பு நடைபெற்றது. மரியாதை நிமித்தமாக ஜனாதிபதி திரவுபதி முர்முவை உள்துறை மந்திரி அமித்ஷா சந்தித்து பேசியதாக ஜனாதிபதி மாளிகையின் டுவிட்டர் பக்கத்தில் தெரிவிக்கப்பட்டுள்ளது.

முன்னதாக எதிர்க்கட்சிகளின் 'இந்தியா' கூட்டணி தலைவர்கள் நாளை ஜனாதிபதியை சந்திக்க திட்டமிட்டுள்ளனர். இந்த சந்திப்பின் போது மணிப்பூர் விவகாரம் குறித்து எதிர்க்கட்சிகள் ஜனாதிபதியிடம் மனு அளிக்க உள்ளன. மணிப்பூர் விவகாரம் குறித்து நாடாளுமன்றத்தில் விவாதம் நடைபெறாதது குறித்தும் முறையிட உள்ளதாக கூறப்படுகிறது.