நாட்டின் பாதுகாப்புக்காக எந்த வகையான சவாலையும் எதிர்கொள்ளும் வல்லமையுடன் இந்திய பாதுகாப்பு படைகள் இருப்பதாக மத்திய பாதுகாப்புத்துறை அமைச்சர் அருண் ஜெட்லி தெரிவித்துள்ளார். தேசப்பிதா மகாத்மா காந்தியால் கடந்த 1942 ஆம் ஆண்டு வெள்ளையனே வெளியேறு இயக்கம் துவங்கப்பட்டது. இந்த இயக்கம் துவங்கப்பட்டதன் 75 வது ஆண்டு தினம் இன்று கொண்டாடப்பட்டது.

மாநிலங்களவையில் இது தொடர்பான விவாதத்தை துவக்கி வைத்து பேசிய அருண் ஜெட்லி கூறியதாவது:- இந்த தசாப்தங்களில் இந்தியா பல சவால்களை எதிர்கொண்டுள்ளது. ஆனாலும், ஒவ்வொரு சவாலிலும் இருந்தும் இந்தியா பலம் மிக்கதாக மாறி வருகிறது என்பதை நாம் பெருமையுடன் சொல்லலாம். 1962 ஆம் ஆண்டைய சீன போரில் இருந்து இந்தியா பாடம் கற்று கொண்டிருக்கிறது. ஆயுதப்படை முழு பலம் மிக்கதாக மாறிவருகிறது. ஏனெனில், இப்போதும் கூட இந்தியா தனது அண்டைநாடுகளிடம் இருந்து சவாலை எதிர்கொண்டுள்ளது. 1962 ஆம் ஆண்டை ஒப்பிட்டு பார்க்கும் போது 1965, 1971 போர்களின் போது இந்தியா பலம் மிக்கதாக மாறியது.