பிரதமர் மோடி தலைமையிலான மத்திய மந்திரி சபையில் திறன் மேம்பாட்டு மற்றும் தொழில்முனைவோர் துறை மந்திரியாக இருந்து வருபவர் அனந்தகுமார் ஹெக்டே. இவர், தொடர்ந்து சர்ச்சையை ஏற்படுத்தும் விதமாக பேசி வருகிறார். சமீபத்தில், மதசார்ப்பற்றவர்கள் பெற்றோர் யார் என தெரியாதவர்கள் எனவும், அரசியல் சாசனத்தை மாற்ற வேண்டும் எனவும் மத்திய மந்திரி அனந்தகுமார் ஹெக்டே பேசி இருந்தார். இதற்கு காங்கிரஸ் கட்சி கடும் எதிர்ப்பு தெரிவித்தது.

மேலும் தலித் அமைப்பை சேர்ந்தவர்கள் மத்திய மந்திரி அனந்தகுமார் ஹெக்டேவை கண்டித்து போராட்டத்தில் ஈடுபட்டார்கள். கர்நாடக மாநிலம் பல்லாரியில் நிகழ்ச்சி ஒன்றில் கலந்துக் கொள்ள அனந்தகுமார் ஹெக்டே சென்ற போது தலித் அமைப்பை சேர்ந்தவர்கள், அரசியல் சாசனத்தை மாற்ற வேண்டும் என்று கூறியதை கண்டித்து ஹெக்டேவுக்கு எதிராக போராட்டத்தில் ஈடுபட்டார்கள். மேலும் அவருக்கு கருப்புக்கொடி காட்டி தங்களது எதிர்ப்பை வெளிப்படுத்தினார்கள். இதனையடுத்து நிகழ்ச்சியில் பேசிய அனந்த குமார் ஹெக்டே, சாலையில் நடந்து செல்லும் போது தெரு நாய்கள் குரைப்பது பற்றி கவலைப்படக்கூடாது. அதுபற்றி சிந்தித்து தலைவலியை ஏற்படுத்தி கொள்ள விரும்பவில்லை என மீண்டும் சர்ச்சைக்குரிய வகையில் பேசினார். இதற்கும் பல்வேறு தரப்பில் கண்டனம் தெரிவிக்கப்பட்டு வருகிறது.