ஆக்ஸ்போர்டு பல்கலைக்கழகத்தின் சார்பில் தென்ஆப்பிரிக்காவில் இந்த தடுப்பூசியின் முதல் 2 கட்ட பரிசோதனைகள் முடிந்துவிட்டன. இங்கிலாந்தில் 2-வது மற்றும் 3-வது கட்ட பரிசோதனைகள் நடைபெற்று வருகின்றன. இந்தியாவிலும் 2-வது மற்றும் 3-வது கட்ட பரிசோதனையை நடத்த முடிவு செய்யப்பட்டது.

ஏற்கனவே நடைபெற்ற பரிசோதனை முடிவு மிகவும் நம்பிக்கை அளிப்பதாக இருந்ததை தொடர்ந்து, இந்தியாவில் மனிதர்களிடம் 2-வது மற்றும் 3-வது கட்ட பரிசோதனையை மேற்கொள்ள அனுமதி கோரி சீரம் இன்ஸ்டிடியூட், இந்திய மருந்து கட்டுப்பாட்டு அமைப்புக்கு விண்ணப்பித்தது.

முதல் கட்ட பரிசோதனை முடிவின் அம்சங்களை ஆய்வு செய்த நிபுணர் குழு வழங்கிய சிபாரிசுகளின் அடிப்படையில், 2-வது மற்றும் 3-வது கட்ட பரிசோதனைகளை மேற்கொள்ள சீரம் இன்ஸ்டிடியூட்டுக்கு இந்திய மருந்து கட்டுப்பாட்டு அமைப்பு அதிகாரி டாக்டர் வி.ஜி.சோமானி நேற்று முன்தினம் இரவு அனுமதி அளித்ததாக நேற்று மத்திய அரசு அதிகாரிகள் தெரிவித்தனர். 3-வது கட்ட பரிசோதனையை தொடங்கும் முன் சீரம் இன்ஸ்டிடியூட் தடுப்பூசியின் பாதுகாப்பு தன்மை குறித்த பாதுகாப்பு தரவு கண்காணிப்பு வாரியத்தின் மதிப்பீட்டு அறிக்கையை சீரம் இன்ஸ்டிடியூட் தாக்கல் செய்ய வேண்டும் என்றும் அவர்கள் கூறினார்கள்.

பரிசோதனைக்கு உட்படுத்தப்படும் நபர்களுக்கு தடுப்பூசி மருந்து செலுத்தப்பட்ட 29-வது நாளில் அடுத்த ஊசி போடப்படும் என்றும் குறிப்பிட்ட கால இடைவெளியில் தடுப்பூசியின் பாதுகாப்பு தன்மை, நோய் எதிர்ப்பு சக்தி ஆகியவை ஆய்வு செய்யப்படும் என்றும் அவர்கள் தெரிவித்தனர்.

2-வது மற்றும் 3-வது கட்ட பரிசோதனைகளுக்கு அனுமதி கிடைத்ததை தொடர்ந்து, சீரம் இன்ஸ்டிடியூட் நிறுவனம் இந்தியா முழுவதும் 18 வயதுக்கு மேற்பட்ட 1,600 பேருக்கு கோவிஷீல்டு தடுப்பூசியை செலுத்தி பரிசோதிக்க இருக்கிறது. டெல்லியில் உள்ள எய்ம்ஸ் மருத்துவமனை, புனேயில் உள்ள பி.ஜே.மருத்துவ கல்லூரி ஆஸ்பத்திரி, விசாகப்பட்டினத்தில் உள்ள ஆந்திரா மருத்துவ கல்லூரி ஆஸ்பத்திரி, கோரக்பூரில் உள்ள நேரு ஆஸ்பத்திரி உள்ளிட்ட 12 நகரங்களில் உள்ள ஆஸ்பத்திரிகளில் இந்த சோதனை நடைபெற இருக்கிறது.