மேற்கு வங்க மாநிலத்தின் முன்னாள் முதல்வரும் புகழ்பெற்ற மருத்துவருமான பிதன் சந்திரராய், மருத்துவத்துறைக்கு அளித்த பங்களிப்பை போற்றும் வகையில் ஒவ்வொரு வருடமும் ஜூலை 1 ஆம் தேதி தேசிய மருத்துவர்கள் தினமாக கொண்டாடப்படுகிறது. பிதன் சந்திரராய் பிறந்ததும், மறைந்ததும் ஜூலை ஒன்றாம் தேதி தான். இந்திய மருத்துவ கவுன்சில் மற்றும் இந்திய மருத்துவ சங்கம் ஆகியவற்றை தோற்றுவித்ததில் இவரது பங்கு மிகப்பெரியது ஆகும்.

இதனை முன்னிட்டு இன்று நாடு முழுவதும் பலரும் மருத்துவர்களுக்கு வாழ்த்து தெரிவித்து வருகின்றனர். அதிலும் குறிப்பாக தற்போதைய கொரோனா காலகட்டத்தில் மருத்துவர்கள் பலர் தங்கள் உயிரையும் பொருட்படுத்தாமல், குடும்பத்தினரை பல நாட்கள் பிரிந்து மருத்துவ சேவையில் ஈடுபட்டு வந்ததை காண முடிந்தது. இந்த சேவையில் பல மருத்துவர்கள் தங்கள் இன்னுயிரையும் இழந்துள்ளனர். அத்தகைய மருத்துவர்களை போற்றும் நாளாகவும், தேசிய மருத்துவர்கள் தினம் கடைப்பிடிக்கப்படுகிறது.