உத்தரகாண்டில் பேஸ்புக் பயன்படுத்துபவர்கள் 35 லட்சம்பேர் உள்ளனர். அவர்களில் 20 லட்சம்பேரை தங்கள் பிரசாரம் மூலம் எட்டி விட்டதாக பா.ஜனதா தகவல் தொழில்நுட்ப பிரிவு தலைவர் ஹிமன்சு சங்தானி தெரிவித்தார். சமூக வலைத்தளங்களில் ஒவ்வொரு கூட்டத்தையும் சராசரியாக 1 லட்சம் பேர் பார்த்துள்ளதாக அவர் கூறினார். தலைவர்களின் பிரசார திட்டங்கள், டெல்லியில் வகுக்கப்படுகின்றன.

எதிர்க்கட்சியான காங்கிரசும் சமூக வலைத்தளங்கள் மூலம் பிரசாரம் செய்து வருகிறது. 400 சமூக வலைத்தள தன்னார்வலர்களை களம் இறக்கி உள்ளது. பேஸ்புக், டுவிட்டர், இன்ஸ்டாகிராம் மற்றும் கட்சியின் அதிகாரபூர்வ 150 வாட்ஸ்அப் குழுக்கள் ஆகியவை மூலமாக 1,500 ஊழியர்கள் கட்சியின் செய்தியை பரப்பி வருகிறார்கள். என்னென்ன தகவல்களை ஆடியோ-வீடியோ வடிவிலும், கார்ட்டூன் வடிவிலும் பிரசாரம் செய்யலாம் என்பதை தீர்மானிக்க 50 படைப்பாளிகள் கொண்ட குழு இயங்கி வருகிறது.

சமீபகாலம் வரை காங்கிரஸ் மூத்த தலைவர்கள் பலர் டெல்லியில் இருந்ததால், அவர்களின் காணொலி வடிவ பொதுக்கூட்டங்கள் அவ்வளவாக நடத்தப்படவில்லை. அவர்கள் உத்தரகாண்டுக்கு திரும்பி விட்டதால், இனிமேல் காணொலி பொதுக்கூட்டங்களை அக்கட்சி நடத்த உள்ளது.

நேற்று முன்தினம் வெளியிடப்பட்ட காங்கிரசின் பிரசார பாடலான சார் தாம் சார் காம், சமூக வலைத்தளங்களில் டிரெண்ட் ஆகி வருகிறது.