தேசிய செய்திகள்

‘காந்தள் நாட்கள்’ கவிதை நூலை எழுதிய மறைந்த கவிஞர் இன்குலாபுக்கு சாகித்ய அகாடமி விருது

‘காந்தள் நாட்கள்’ என்ற கவிதை நூலை எழுதிய மறைந்த கவிஞர் இன்குலாப், மலையாள நாவலை தமிழில் மொழிபெயர்த்த கவிஞர் யூமா வாசுகி உள்பட 24 பேருக்கு சாகித்ய அகாடமி விருது அறிவிக்கப்பட்டுள்ளது.

Published:21st Dec, 2017 at 10:30 PM

புதுடெல்லி,

மத்திய அரசின் மனிதவள மேம்பாட்டுத் துறை அமைச்சகத்தின் கீழ் இயங்கும் சாகித்ய அகாடமி அமைப்பு ஆண்டுதோறும் 24 இந்திய மொழிகளில் சிறந்த படைப்புகளை தேர்வு செய்து விருது வழங்கி வருகிறது. 2017-ம் ஆண்டுக்கான சிறந்த தமிழ் படைப்புக்கான விருது மறைந்த கவிஞர் இன்குலாப் எழுதிய காந்தள் நாட்கள் என்ற கவிதை நூல் படைப்புக்கு வழங்கப்படுகிறது.

கவிஞர் இன்குலாப் சமூக அக்கறை தோய்ந்த ஒடுக்குமுறைக்கு எதிரான போராட்ட கவிதைகளை படைத்தவர். இவரது படைப்புகள் இலக்கிய உலகத்தால் மட்டுமல்ல, போராட்டக்காரர்களுக்கும், தொழிற்சங்கத் தோழர்களுக்கும் உரம் சேர்க்கும் படைப்புகளாக விளங்குகின்றன. இவருடைய மனுசங்கடா நாங்க மனுசங்கடா எனும் கவிதை பல மேடைகளில் பாடப்படுகிறது. இன்குலாப் எழுதிய அவ்வை நாடகம் பெண்ணியம் பேசும் நாடக மேடைகளில் முக்கியத்துவம் பெறும் படைப்பாக விளங்குகிறது.

சாகித்ய அகாடமி செயலாளர் சீனிவாசராவ் கூறும்போது, இந்தியா முழுவதும் அங்கீகரிக்கப்பட்ட 24 மொழிகளில் 7 நாவல்கள், 5 கவிதை நூல்கள், 5 சிறுகதை தொகுப்புகள், 5 இலக்கிய திறனாய்வு நூல்கள், ஒரு நாடகம் மற்றும் ஒரு கட்டுரை தொகுப்பு ஆகியவற்றுக்கு இந்த ஆண்டுக்கான விருதுகள் வழங்கப்படுகின்றன. அனைத்து மொழிகளின் நிபுணர் குழுக்கள் பரிந்துரைத்த விருதுக்கான படைப்புகளுக்கு சாகித்ய அகாடமி தலைவர் டாக்டர் விஸ்வநாத்பிரசாத் திவாரி தலைமையிலான செயற்குழு ஒப்புதல் அளித்தது என்றார்.