மார்ச் 11-ம் தேதி ஆனந்த்நாக்கில் நடைபெற்ற என்கவுண்டரில் பாதுகாப்பு படையினர் மூன்று பயங்கரவாதிகளை சுட்டு வீழ்த்தினர். இதில் இரண்டு பயங்கரவாதிகள் ஜம்மு காஷ்மீரை சேர்ந்தவர்கள் என அடையாளம் காணப்பட்டது. ஒருவர் ஸ்ரீநகரின் சவுரா பகுதியை சேர்ந்த இசா பாஸ்லி எனவும் மற்றொருவர் கோகெர்நாக் பகுதியை சேர்ந்த சையத் ஓவைசி எனவும் அடையாளம் காணப்பட்டது. இப்போது மூன்றாவது நபர் யாரென்று அடையாளம் காணப்பட்டு உள்ளார். அவர் தெலுங்கானா மாநிலத்தை சேர்ந்த முகமது தவுபிக் என அடையாளம் காணப்பட்டு உள்ளது.

26 வயதான முகமது தவுபிக் தெலுங்கானா மாநிலம் பத்ராத்ரி-கொத்தகூடம் மாவட்டம் மானுகுவை சேர்ந்தவர் என தெரியவந்து உள்ளது. காஷ்மீரை தலைமையகமாக கொண்டு செயல்படும் அல்-கொய்தா பயங்கரவாத இயக்கத்துடன் தொடர்புடைய அன்சார் காஸ்வாத்-அல்-ஹிண்ட் அமைப்பை சேர்ந்தவர் எனவும் கூறப்படுகிறது. கொத்தகூடம் மாவட்ட எஸ்.பி. இந்தியா டுடே செய்தி நிறுவனத்திற்கு அளித்து உள்ள பேட்டியில், முகமது தவுபிக் சமூக வலைதளம் மூலமாக ஈர்க்கப்பட்டு பின்னர் காஷ்மீரில் பயங்கரவாத இயக்கத்தில் இணைந்து உள்ளான், என கூறிஉள்ளார்.