பஞ்சாப் நேஷனல் வங்கியின் மும்பை கிளை ஒன்றில் 1.80 பில்லியன் அமெரிக்க டாலர்கள் மதிப்பிலான பண மோசடி நடந்து உள்ளது. இது தொடர்பாக வங்கி நிர்வாகம் சி.பி.ஐ.யிடம் அளித்த அந்த புகாரில் மும்பையை சேர்ந்த பிரபல வைர வியாபாரியும், கோடீசுவரருமான நிரவ் மோடி நிறுவனம் இந்த மோசடியில் ஈடுபட்டு இருப்பதாக தெரிவிக்கப்பட்டது. இவ்வழக்கில் வைர வியாபாரி நிரவ் மோடி, தொழில் அதிபர் மெகுல் சோஷி முக்கிய புள்ளியாக உள்ளனர். சிபிஐ இதுதொடர்பாக வங்கி அதிகாரிகளையும் கைது செய்து உள்ளது.

பஞ்சாப் நேஷனல் வங்கி ஊழலில் சிபிஐ, அமலாக்கப்பிரிவு, வருமான வரித்துறை சோதனை மற்றும் விசாரணையில் தீவிரமாக களமிறங்கி உள்ளது. நேற்று மாலை தெரிவிக்கப்பட்ட தகவலின்படி அமலாக்கப்பிரிவு பறிமுதல் செய்து உள்ள வைரம், தங்கம் மற்றும் விலைமதிப்புமிக்க பிற கற்களின் விலை ரூ. 5,674 கோடி என குறிப்பிடப்பட்டு இருந்தது. சொத்துக்களும் பறிமுதல் செய்யப்பட்டு வருகிறது. மோசடி நடைபெற்ற பஞ்சாப் நேஷனல் வங்கியின் கிளையையும் சிபிஐ சீல் வைத்தது.