இருந்தபோதிலும் போலீசாரின் தடுப்புகளை கடந்த விவசாயிகள், டிராக்டர்களுடன் டெல்லி செங்கோட்டை பகுதிக்குள் நுழைந்தனர். அங்கு செங்கோட்டையின் முன் டிராக்டர்களை நிறுத்தியும், தேசிய கொடி கம்பத்தின் அருகே திரண்டு கோஷங்களையும் எழுப்பினர். பின்னர், விவசாயிகள் மத கொடி ஒன்றை செங்கோட்டையில் ஏற்றினர்.

டெல்லியில் டிராக்டர் பேரணியில், விவசாயிகள் கடுமையாக தாக்கியதில் 83 போலீசார் காயம் அடைந்து உள்ளனர் என போலீசார் தெரிவித்தனர். கிழக்கு டெல்லி பகுதியில் வன்முறையில் ஈடுபட்டதற்காக 4 வழக்குகள் பதிவு செய்யப்பட்டு உள்ளன. 8 பேருந்துகள் மற்றும் 17 தனியார் வாகனங்கள் அடித்து நொறுக்கப்பட்டு உள்ளன என தெரிவிக்கப்பட்டது. 19 பேர் கைது செய்யப்பட்டு, 25 குற்ற வழக்குகள் பதிவாகி உள்ளன.

இதனால், டெல்லி தொடர்ந்து பதற்றத்துடனேயே காணப்படுகிறது. இந்நிலையில், டெல்லியில் பேரணி முடிந்து தங்களது பழைய போராட்ட பகுதிகளுக்கு விவசாயிகள் திரும்பினர். தொடர் போராட்டத்தில் அவர்கள் ஈடுபட்டு உள்ளனர். இன்று காலை மீண்டும் திக்ரி மற்றும் சிங்கு எல்லையில் விவசாயிகள் போராட்டம் தொடர்ந்து வருகிறது.

இந்த போராட்டத்தினால், போக்குவரத்துக்கு ஏற்படும் இடையூறுகளை களைய, டெல்லியில் வாகன போக்குவரத்தில் மாற்றம் செய்யப்பட்டு உள்ளது. இதுபற்றி டெல்லி போக்குவரத்து போலீசார் அறிவிப்பு வெளியிட்டு உள்ளனர்.

இதன்படி, சிங்கு, ஆச்சண்டி, மங்கேஷ், சபோலி, பியாவ் மணியாரி ஆகிய எல்லைகள் மூடப்படுகின்றன. லாம்பூர், சபியாபாத், சிங்கு பள்ளிக்கூடம் மற்றும் பல்லா சுங்க சாவடி எல்லை பகுதிகள் திறந்திருக்கும்.

நரேலா பகுதியருகே தேசிய நெடுஞ்சாலை எண் 44 பகுதியில் இருந்து போக்குவரத்து மாற்றி விடப்பட்டு உள்ளது. வெளிவட்ட சாலை பகுதிகள், ஜி.டி.கே. சாலை மற்றும் தேசிய நெடுஞ்சாலை எண் 44 ஆகிய பகுதிகளை தவிர்க்கும்படி போலீசார் அறிவுறுத்தி உள்ளனர்.

காசிப்பூர் எல்லை மூடப்பட்டு, தேசிய நெடுஞ்சாலை எண் 24 மற்றும் தேசிய நெடுஞ்சாலை எண் 9 ஆகியவற்றின் போக்குவரத்து வேறு பகுதிகளில் திருப்பி விடப்பட்டு உள்ளது. சாலை எண் 56, 57ஏ, கொண்டிலி, பேப்பர் மார்க்கெட், டெல்கோ டி பாயிண்ட், இ.டி.எம். மால், அக்ஷர்தாம் மற்றும் நிஜாமுதீன் கட்டா ஆகிய பகுதிகளிலும் போக்குவரத்து மாற்றி விடப்படுகிறது.

இந்த பகுதிகளிலும் மற்றும் விகாஸ் மார்க் பகுதியிலும் வாகன போக்குவரத்து கடும் நெருக்கடியாக காணப்படுகிறது என டெல்லி போக்குவரத்து போலீசார் தெரிவித்து உள்ளனர்.